Lëvizja Vetëvendosje në 107 vjetorin e Kongresit të Manastirit ku delegatët shqiptarë të të gjitha trojeve u dakorduan për alfabetin shqip, ka kujtuar se ende nxënësit shqiptarë të Luginës së Preshevës nuk kanë mundësi të shkollohen me tekste në gjuhën shqipe. Janë rreth mbi 100 mijë tekste mësimore të Republikës së Kosovës për nxënësit shqiptarë të Luginës së Preshevës, që janë bllokuar nga Qeveria e Serbisë, dhe këtë VV e konsideron rast sa të rëndë aq edhe të dënueshëm, transmeton Koha.net
“Përderisa Serbia angazhohet për krijimin e ‘Zajednicës’ në Kosovë me bekimin e Isa Mustafës dhe Hashim Thaçit, ajo vazhdon të mbajë të bllokuar që nga 10 shtatori të këtij viti donacionin me tekste mësimore të Republikës së Kosovës, duke diskriminuar nxënësit shqiptarë të Preshevës, Bujanocit dhe Medvegjës të cilët zhvillojnë procesin edukativo-arsimor pa tekste adekuate mësimore”, thuhet në komunikatën e dërguar nga VV.