Lufta me Iranin pritet t’i kushtojë Izraelit rreth 3 miliardë dollarë në javë.
Kostoja e konfliktit për ekonominë izraelite vlerësohet të arrijë në rreth 9.4 miliardë shekelë (afërsisht 3 miliardë dollarë) në javë, nëse kufizimet kombëtare mbeten në fuqi, sipas Ministrisë së Financave të Izraelit, raporton Reuters.
Të hënën, pas një vlerësimi të situatës në mes të tensioneve me Iranin, Komanda e Frontit të Brendshëm e Forcave të Mbrojtjes së Izraelit (IDF) vendosi të zgjasë kufizimet kombëtare deri në mbrëmjen e së shtunës, më 7 mars.
Masat përfshijnë ndalimin e të gjitha tubimeve publike, pezullimin e aktiviteteve arsimore dhe kufizimin e aksesit në vendet e punës, me përjashtim të bizneseve thelbësore. Udhëzimet parashikojnë gjithashtu kufizim të lëvizjes për në punë, punë nga shtëpia për shumicën e punonjësve dhe mbylljen e shkollave.
Drejtori i Përgjithshëm i Ministrisë së Financave, Ilan Rom, i ka dërguar një letër kreut të Komandës së Frontit të Brendshëm të IDF-së, gjeneralit Shai Klapper, duke kërkuar lehtësimin e kufizimeve dhe kalimin drejt një aktiviteti të kufizuar ekonomik. Ai propozon një rihapje graduale dhe të pjesshme të ekonomisë duke filluar nga dita e nesërme.
“Nuk ka mosmarrëveshje për nevojën e ruajtjes së një politike mbrojtëse të përshtatur me situatën e sigurisë, por një mbyllje ekonomike në shkallë të gjerë sjell kosto të rënda financiare”, thuhet në deklaratën e Rom.
Ai shton se nevojitet një zgjidhje që balancon kërkesat e sigurisë së frontit të brendshëm me nevojat ekonomike, duke kujtuar se ekonomia izraelite ka paguar një çmim të lartë gjatë dy viteve e gjysmë të fundit për shkak të rritjes së shpenzimeve të sigurisë dhe pasojave të konfliktit me Hamasi.
