Kryeministri serb mori pjesë në forumin dyditor në qytetin boshnjak të Srebrenicës dhe ofroi para për rizhvillimin e qytetit, vendin e një masakre në vitin 1995. Aleksandër Vuçiq ka vizituar Srebrenicën për herë të dytë këtë vit pas përkujtimores së 20 vjetorit të masakrave të serbëve të Bosnjës ndaj boshnjakëve që ndodhën në korrik të vitit 1995. Para takimit, kryeministri serb, së bashku me anëtarin boshnjak të presidencës së Bosnjës, Bakir Izetbegoviç, vizitoi qendrën përkujtimore për viktimat në Potoçari, ku vendosi një kurorë me lule për të nderuar 8,372 viktimat e vrara nga trupat e komandantit serb të Bosnjës, gjeneralit Ratko Mlladiç. Në fjalimin e tij në forum, Vuçiç premtoi rreth 5 milionë euro për të kontribuar në zhvillimin e komunës së Srebrenicës.
“Serbia tani dëshiron të shikojë drejt të ardhmes”, tha Vuçiç. “Ne serbët duam të kemi marrëdhëniet më të mira të mundshme me boshnjakët. Duam të ndërtojmë të ardhmen tonë të përbashkët ku do të jetojmë në paqe për 100 vjetët e ardhshme”, tha ai. Sipas Vuçiçit, 2 milionë euro do t’i paguhen drejtpërdrejt komunës së Srebrenicës që të hënën. Pjesa tjetër do të përdoret për zbatimin e projekteve ekonomike dhe zhvilluese, të cilat do të kryen nga kompani nga Serbia dhe Bosnja dhe Hercegovina. Qamil Durakoviç, kryetari i komunës së Srebrenicës, tha se ishte “vërtet i kënaqur” me premtimet e bëra nga qeveria serbe.
“Ne nuk e prisnim një shumë të tillë parash. Për ne kjo nënkupton shumë. Mund të themi që tani se ky forum biznesi ishte një sukses për qytetin. Nesër, sipërmarrësit që janë këtu do të mund të bisedojnë me njëri-tjetrin dhe të zhvillojnë planet e tyre të biznesit. Jam vërtet shumë i lumtur”, tha ai. Në konferencë morën pjesë gjithashtu edhe kryeministri boshnjak, Denis Zvizdiç, Presidenti i Republikës Serbe Milorad Dodik dhe kryeministri i entitetit serb të Bosnjës, Zeljka Cvijanoviç.
