Tri ditë para se të ndodhte ngjarja e rëndë në Patos, Manol Rrapaj kishte kallëzuar penalisht në Policinë e Fierit autorin Martin Skendaj dhe babanë e tij.
Sipas kallëzimit të bërë, siguruar nga Panorama, Martin Skendaj dhe babai i tij kishin shkuar për të debatuar me Rrapajn, me pretendimin se i kishte ngacmuar motrën.
Sipas informacioneve të Policisë, mësohet se Rrapaj, i cili mbeti i vdekur të enjten në dyert e Poliklinikës së Patosit, kishte thënë se në momentin kur ata kishin shkuar për t’u sqaruar, kishin pas me vete edhe mjete prerëse.
Pas denoncimit, materialet i kishin kaluar Prokurorisë së Fierit për kanosje.
Pas kësaj ngjarjeje ndodh një tjetër më e rëndë. 22- vjeçari Martin Skendaj vrau me armë Manol Rrapajn dhe Elis Kapajn në qendrën shëndetësore të Patosit, pas debatit me ta.
Rrapaj ishte i dashuri i motrës së Skendajt, por që ky i fundit nuk e kishte pranuar një fakt të tillë, ndaj dhe e ka qëlluar me armë, duke i marrë jetën bashkë me shokun Kapaj.
Kujtojmë që konfliktet mes dy familjeve ishin mjaft të shpeshta, kjo si pasojë e lidhjes së dashurisë mes dy të rinjve.
Viktima Manol Rrapaj nuk hiqte dorë nga lidhja me motrën e autorit Martin Skendaj. Ky i fundit mësohet se fajësonte viktimën se e motra ishte ndarë nga ish-bashkëshorti për shkak të lidhjes që kishte krijuar me të.
Martin Skëndaj në dëshminë e parë para policisë ka pranuar vrasjen dhe ka konfirmuar se motivi i masakrës ishte një lidhje intime mes fqinjit Rrapaj me motrën e tij.
Para grupit hetimor gardiani 22 vjeçar ka thënë se Rrapaj e vrau pas debateve ku ai nuk pranonte lidhjen me të motrën.
g.kosovari
