Elgert Cara dhe Dorjan Cara, përkatësisht 19 dhe 25 vjeç, dy kushërinjtë e dyshuar për vrasjen me paramendim të 20-vjeçarit Ervis Zyba, kanë pranuar krimin, gjatë marrjes në pyetje nga policia. Kështu shkruan gazeta Panorama, e cila zbardh dëshminë e tyre në polici.
Arrestimi i dy kushërinjve Cara u bë dje rreth orës 01:00, teksa ata po tentonin të shkonin në fshatin e tyre. Ata po lëviznin me një autoveturë në drejtim të fshatit Zhejë, kur janë ndaluar pa rezistencë nga Policia e Kurbinit.
Policia kishte marrë informacione për lëvizjet e dy të rinjve Elgert dhe Dorjan Cara, që dyshohet se gjatë shkëmbimit të zjarrit me Xhevahir Likën, kanë vrarë pasagjerin e tij në mjet, Ervis Zybën.
Gjatë marrjes në pyetje nga grupi hetimor, mësohet se ata kanë pranuar se kanë shkëmbyer zjarr me personat që kishin pasur konflikt që brenda lokalit të natës me muzikë live. Sipas dëshmisë së dhënë, kur kanë dalë jashtë, ata u janë përgjigjur plumbave që vinin në drejtim të tyre nga një armë zjarri që posedonte 21-vjeçari Xhevahir Lika.
Me këtë të fundit njëri prej kushërinjve Cara kishte pasur një konflikt të nisur që një vit më parë, për të cilin policia ka hedhur dyshime se ka nisur që në Itali për pazare droge. Por, gjithsesi, kjo mbetet ende në kuadër dyshimi dhe nuk është konfirmuar zyrtarisht.
“Nuk kishim për qëllim të vrisnin njeri. Gjithçka ka ndodhur në rrethana vetëmbrojtjeje, pasi ne pamë që Xhevahir Lika, me të cilin ne ishim në konflikt, po nxirrte një armë për të na qëlluar nga mjeti që ai drejtonte. Në këtë moment ne kemi reaguar, pasi ashtu sikurse ai, edhe ne kemi qenë të armatosur”, janë shprehur dy të arrestuarit gjatë marrjes në pyetje nga Policia e Kurbinit. Hetuesit nuk dhanë detaje të tjera rreth dëshmisë së tyre për efekt hetimi. Ndërkohë të riut që ndërroi jetë nga dy plumba, një në kokë dhe një në gjoks i është dhënë lamtumira e fundit të nesërmen e ngjarjes.
Dëshmitarët kanë pohuar në polici se viktima kishte debatuar në lokalin e natës me dy kushërinjtë, duke u kërkuar atyre llogari se pse kishin ardhur në të njëjtin lokal ku ndodhej ai me Xhevahir Likën. Me këtë të fundit ata ishin në një konflikt të vjetër, ndaj sherri që nisi në lokal, ka precipituar me shkëmbim zjarri në momentin kur kanë dalë jashtë.
Policia
Një ditë pas ngjarjes së rëndë, Policia zbardhi edhe mekanizmin e krimit dhe shpalli në kërkim dy autorët e dyshuar.
“Nga veprimet e kryera rezulton se shtetasit Xhevahir Lika dhe shtetasi Elgert Cara ishin të përfshirë në një konflikt për motive të dobëta, që para rreth një viti. Ervis Zyba ishte shok i shtetasit Xhevahir Lika dhe të dy së bashku, natën kur ndodhi krimi, kanë shkuar në një lokal në lagjen nr.6 Kurbin, në të cilin kishte muzikë live. Pasi kanë qëndruar rreth katër orë në këtë lokal, të dy këta shtetas kanë dalë rreth orës 01:30 dhe kanë hipur në automjetin e tyre të markës ‘Mercedes-Benz’ me targë AA 898 MR.
Në atë moment, te mjeti janë afruar Elgert Cara dhe Dorjan Cara, të cilët janë konfliktuar me shtetasin Xhevahir Lika. Në debat e sipër, duke qenë se dy palët kanë qenë të armatosura, Elgert Cara ka qëlluar me armë automatike, ndërsa Dorjan Cara ka qëlluar me armë zjarri pistoletë në drejtim të mjetit ku ishin Xhevahir Lika dhe viktima Ervis Zyba. Shtetasi Xhevahir Lika është kundërpërgjigjur me armë zjarri pistoletë. Nga shkëmbimi i zjarrit ka mbetur i vrarë Ervis Zyba, 20 vjeç, lindur dhe banues në Gjormë të Bashkisë Kurbin”, thuhej në njoftimin e dhënë nga Policia për ngjarjen.
Panorama
