Teksa Prokuroria e Tiranës dorëzoi dosjen hetimore për ekzekutimin e biznesmenit Ruzhdi Hoxha në gjykatë duke marrë të pandehur Ferdinand Rrushin si autorin e vrasjes në Tetor në zonën e Qafë Mollës, makina e cila dyshohet të jetë përdorur në krim vazhdon e zhdukur.
Sipas burimeve të Tv Klan, ndonëse rezulton se Prokuroria ka arritur të zbardhë lëvizjet e fundit të mjetit, e vërteta e të cilit duket se mbetet mes vëllait të Ferdinand Rrushit dhe një tjetër shtetasi me inicialet, B.K.. Të dy të ballafaquar nga hetuesit.
Sipas kamerave të sigurisë për 30 minuta, mjeti ka qëndruar i parkuar pranë lokalit të vëllait të Ferdinand Rrushit dhe këto pamje duket se në disa raste shtetasi B.K. dhe vëllai i Rrushit kryejnë veprime si ato të kontrollit në mjet, teksa më vonë shihen me një qese të zezë në dorë.
Disa momente më vonë, në këto kamera sigurie, pranë mjetit shfaqet edhe një punonjës policie, i cili komunikon diçka me vëllain e Ferdinand Rrushit, dhe më pas largohet.
Makina është zhvendosur nga aty në datën 25 Tetor në orët e pasdites dhe deri më tani nuk është gjetur, teksa konsiderohet ende kyçe nga hetuesit. Ndërkohë Prokuroria liroi nga akuzat vëllain e Rrushit, i cili u arrestua fillimisht si bashkëpunëtor në krim në fshehjen e provave.
/s.f
