Grabitësi i 100 mijë lekëve në lokalin e Arqile Poçit, në Shkallë të Konispolit, nuk është nuk është vrasësi i Pajtim Shehut deklaruan dje burime nga policia e Sarandës. Ngjarja është e ngatërruar, pasi dyshohet të jenë dy autorë, të cilët pritet të vihen nën akuzë për dy vepra të ndryshme penale, shkruan Gazeta Shqiptare. Për të hedhur dritë mbi ngjarjen në tërësi janë shoqëruar dhe marrë në pyetje me dhjetëra persona, përfshirë këtu të afërm të viktimës dhe të pronarit të lokalit, persona me precedentë penalë (kryesisht të skeduar për grabitje në fshatin Shkallë dhe në të gjithë zonën e Konispolit). Gjithashtu, në mes të të shoqëruarve është dhe një person nga fshati Shkallë, që dyshohet të jetë autor i vrasjes, pasi i janë gjetur gjurmë baruti në duar. Burimet e mësipërme sqaruan se ky i fundit (emri nuk bëhet me dije) është fqinj i viktimës. Ndërsa, ende nuk dihet nëse fqinji e ka qëlluar aksidentalisht 44-vjeçarin, pasi mund ta ketë ngatërruar me grabitësin, apo e ka vrarë me dashje për shkak të një konflikti të mëparshëm me të.
Policia e Sarandës ka ndërmarrë një operacion në fshatin Shëndëlli, ndërsa ka shoqëruar një person, i cili mendohet të jetë autor i disa grabitjeve. Sipas hetuesve të çështjes, nuk përjashtohet mundësia që ky të jetë pikërisht autori i grabitjes së lokalit të Arqile Poçit.
Rreth orës 02:00 të mëngjesit të së shtunës, Arqile Poçi ka dëgjuar zhurmë në lokalin e tij, i cili ndodhet ngjitur me banesën ku ai banon. Edhe pse ishte natë, Poçi nuk ka ngurruar të marrë në telefon shokun e tij, Pajtim Shehun dhe t’i kërkojë ndihmë. Ky i fundit është treguar i gatshëm dhe ka dalë menjëherë nga shtëpia e tij dykatëshe, që ndodhet rreth 500 m larg lokalit të Poçit. Mësohet se në pjesën e poshtme të lokalit, Shehu është qëlluar me një plumb në ballë nga një person ende i paidentifikuar.
