Komisioni i posaçëm për reformën në drejtësi miratoi disa nene që lidhen me detyrimet e Shqipërisë pas anëtarësimit në BE, ndërsa pati përplasje për nenin 6/1 të paketës që ka të bëjë me ndryshimin e amendamenteve në ligjin e ‘dekriminalizimit’.
Komisioni, i mbledhur paraditen e sotme pa praninë e mediave, nisi diskutimin nen për nen të paketës së rishikuar të ndryshimeve kushtetuese, propozuar nga ekspertet e OPDAT dhe EURALIUS. Në përfundim të mbledhjes, nënkryetari i komisionit, Eduard Halimi tha se pjesa më e madhe e neneve të diskutuara kishin të bënin me detyrimet e Shqipërisë, pas anëtarësimit në BE.
“Pjesa më e madhe e këtyre neneve kishte të bënte me detyrimet që ka Shqipëria pas anëtarësimit në BE dhe nuk kanë lidhje me reformën në drejtësi. Ekspertët sqaruan të gjithë anëtarët e komisionit se këto norma janë aplikuar edhe në vende të tjera, para se ato të merrnin statusin e kandidatit. Nenet kaluan me disa redaktime të thjeshta”, bëri të ditur Halimi. Ndërkohë, që sipas tij pati debate të forta lidhur me ndryshimin e nenit 6/1 që ka të bëjë me ndyshimin e amendamenteve për dekriminalizimin.
“Qëndrimi i padiskutueshëm dhe i qartë i opozitës ishte se reforma në drejtësi dhe detyra që ka komisioni i posaçëm është që të largojë dhe të dënojë ata persona që kanë kryer krime të tmerrshme dhe që kanë qenë subjekt i ligjit të dekriminalizimit. Futja e këtij neni në axhendën e komisionit ishte ‘një atentat’ që kërkohej t’i bëhej reformës në drejtësi. Pati debate, dhe neni u votua ku maxhoranca përdori edhe ‘double vote’, me qëllimin që personat që kanë kryer krime të rënda si trafiku i qenieve njerëzore, i prostitucionit apo armëve të mos kishin një ndalim përjetë, por me një kohëzgjatje të caktuar”, sqaroi Halimi.
Për nenin ne fjalë, mësohet se kryetari i komisionit Fatmir Xhafaj ka përdorur të drejtën për votë të dyfishtë, për të shmangur një dështim të mundshëm.
Neni 3
Në nenin 6/1 pas fjalës “ndalohet” shtohen fjalët “për një kohëzgjatje të caktuar”
Ndalohet për një kohëzgjatje të caktuar[1] zgjedhja, emërimi apo ushtrimi i një funksioni publik në një nga organet e parashikuara në këtë Kushtetutë, ose të krijuara me ligj, pavarësisht përcaktimeve të bëra në dispozitat e tjera të kësaj Kushtetute, nëse verifikohen rrethana që cënojnë integritetin e funksionarit publik, sipas kushteve dhe rregullave të përcaktuara me ligj të miratuar me tre të pestat e të gjithë anëtarëve të Kuvendit.
[1] Opinioni Final i Komisionit të Venecias 824/2015 paragrafi 74
(javanews.al / a.r)
