Presidentja e Komisionit Evropian, Ursula von der Leyen, deklaroi të enjten se Bashkimi Evropian duhet të ndërtojë “kapacitet për të penguar provokimet dhe agresionin”, pasi Rumania shkatërroi një dron detar të mbushur me eksploziv pranë një platforme gazi në Detin e Zi.
Von der Leyen e cilësoi ngjarjen si pjesë të një “fushate përshkallëzuese kërcënimesh” që synon të shqetësojë qytetarët dhe të përçajë Unionin, duke e quajtur atë “luftë hibride”.
Ministri rumun i Mbrojtjes, Radu Miruță, sqaroi se droni u pa disa qindra metra larg platformës Neptun Deep, e vendosur në zonën ekskluzive ekonomike të vendit, rreth 80 milje detare në lindje të Konstancës. Roja Bregdetare njoftoi ministrinë, e cila ngriti një qelizë komande dhe kërkoi mbështetje nga NATO përpara se dy avionë luftarakë F-16 të urdhëroheshin të shkatërronin dronin.
Presidenti i Rumanisë, Nicuşor Dan, dënoi atë që e quajti intensifikim të “incidenteve të papërgjegjshme” nga Rusia.
Incidenti ndodhi pranë një prej projekteve më të rëndësishme energjetike të Rumanisë, Neptun Deep, i cili pritet të jetë burim i madh potencial i gazit.
Von der Leyen e përdori rastin për të promovuar iniciativën Eastern Flank Watch, si mekanizëm për “shkallëzimin e prodhimit në Evropë dhe sigurimin e aftësive që u nevojiten shteteve anëtare”.
