Identifikohet autori i atentatit të mbrëmshëm në Vlorë. Policia e Vlorës bën me dije se ka identifikuar autorin e plagosjes së shtetasit Arlind Lulushi, 28 vjeç, mbrëmjen e kaluar në qytetin e Vlorës. “Autori i dyshuar është shtetasi Paris Sulejmani, 29 vjeç, banues në Vlorë”- njofton policia.
Sipas saj, ky shtetas është person me precedent penal të mëparshëm, i arrestuar më parë për veprat penale “Prodhim dhe shitje narkotikësh” dhe “Falsifikimi i vulave, stampave dhe formularëve”. Po punohet intensivisht për kapjen dhe arrestimin e tij.
Ngjarja
Arlind Lulushi u qëllua mbrëmë rreth orës 19:50 në lagjen “Isa Boletini”, pranë vendit të quajtur “Kali i Trojës”. Sipas Policisë, një person i paidentifikuar ende ka qëlluar me armë zjarri shtetasin Arlind Lulushi, i cili është plagosur në këmbë dhe ndodhet në Spitalin e Vlorës, në gjendje të rëndë.
Ngjarja ndodhi në të njëjtin vend si tre muaj më parë, ku i riu punon në një pikë bastesh. Pasi ka qëlluar me armë zjarri, autori është larguar duke përfituar nga errësira. Për t’i shpëtuar vrasjes, 28-vjeçari është larguar me vrap në rrugën kryesore, ndonëse i plagosur, por më pas ka rënë pa ndenja.
Ka qenë një mjet i rastit që e ka çuar me urgjencë në spital. Policia e Vlorës bëri të ditur se është përqendruar në disa pista, që nga hakmarrja e mundshme, pasi djali i xhaxhait të tij është autor i një vrasjeje të dyfishtë në vitin 2015, deri te larja e hesapeve dhe konfliktet personale të vetë të riut.
Burime të Policisë bënë të ditur se në vitin 2011, Lulushi ka qenë i arrestuar për lëndë narkotike. Për këtë shkak, nuk përjashtohet dyshimi që ai të jetë implikuar në rrjet shitjeje apo trafikimi, por kjo pistë mbetet për t’u verifikuar. Gjithashtu, janë duke u verifikuar konflikte të tjera të tij, por Policia e Vlorës për efekt hetimi nuk bëri të ditur të dhëna konkrete.
Emri i Arlind Lulushit mësohet se lidhet dhe me një ngjarje të rëndë që tronditi dy vite më parë Vlorën, ku dy të rinj, një djalë dhe një vajzë, mbetën të vrarë pas të shtënave me armë.
Ngjarja ndodhi më 2 janar të vitit 2015. Ervis Lulushi (djali i xhaxhait të Arlind Lulushit) vrau me armë zjarri 21-vjeçaren Paola Bisha dhe kushëririn e saj, Parid Velaj, 28 vjeç. Ngjarja ndodhi për shkaqe xhelozie, pasi autori i kërkonte vajzës, studente në Gjermani, që të lidheshin së bashku. Në atë kohë, Policia shoqëroi Arlind Lulushin, i cili u akuzua si bashkëpunëtor i kushëririt të tij, Ervis Lulushi. Por ai u lirua për mungesë provash.
ma.me
