Presidentja e Kosovës, Vjosa Osmani, e ka mbështetur operacionin e SHBA-së në Venezuelë të shtunën. Ajo ka thënë se Kosova qëndron fuqishëm me SHBA-në dhe presidentin Donald Trump në mbështetje të veprimeve kundër regjimit narko-terrorist të Venezuelës.
Ajo ka shtuar se Kosova e kupton ndikimin e vendosmërisë amerikane e se çlirimi i Kosovës është dëshmi e saj.
“Kosova e kupton ndikimin e vendosmërisë amerikane – çlirimi ynë është një dëshmi e kësaj. Në një moment kur SHBA-të po përballen me tiraninë në Venezuelë, të gjithë duhet ta përforcojmë këtë qëndrim, sepse komuniteti transatlantik është më i fortë kur bashkohet pas lidershipit amerikan dhe vlerave të përbashkëta. Kur Amerika udhëheq, ne qëndrojmë me krenari së bashku – sepse liria jonë kolektive varet prej saj”, ka shkruar ajo.
Kurti: Kosova mbështet luftën kundër trafikut ndërkombëtar të drogës
Kryeministri i Republikës së Kosovës, Albin Kurti, ka shprehur mbështetjen e plotë të Kosovës për operacionin anti-narkotik të Shteteve të Bashkuara të Amerikës në Venezuelë, të udhëhequr nga presidenti Donald Trump, duke e cilësuar mbajtjen përgjegjës të aktorëve shtetërorë të përfshirë në trafikimin e drogave si “thelbësor për suksesin në luftën kundër kësaj dukurie”.
Në një postim në rrjetet sociale sot në 3 janar, Kurti thekson se Kosova, si aleate strategjike e SHBA-së dhe NATO-s, qëndron fuqishëm në krah të përpjekjeve për luftimin e krimit të organizuar dhe mbrojtjen e vlerave demokratike perëndimore.
