Ministri i Jashtëm italian, Tajani, ka deklaruar se ecuria e Malit të Zi dhe Shqipërisë ka treguar se, kur zbatohen reformat, procesi i anëtarësimit mund të prodhojë rezultate të prekshme.
“Mali i Zi dhe Shqipëria kanë treguar se, kur zbatohen reformat, procesi i anëtarësimit në BE mund të prodhojë rezultate të prekshme. Italia do të marrë presidencën e BE-së në gjysmën e parë të vitit 2028. Ky moment do të ishte një mundësi e shkëlqyer për të festuar shtimin e anëtarëve të rinj në familjen evropiane.”
Tajani tha se Italia e konsideron ribashkimin e Ballkanit Perëndimor me BE-në si një përparësi kryesore.
“Ne duhet të angazhohemi plotësisht për ribashkimin e Ballkanit Perëndimor me BE-në. Duhet t’i dërgojmë një mesazh të fortë Rusisë dhe kombeve të tjera, sepse ju jeni Evropa. Ne duhet të mbrojmë besueshmërinë, parashikueshmërinë dhe cilësinë e procesit të zgjerimit, duke siguruar një qasje ndaj pranimit të bazuar në meritë dhe duke shmangur çdo anëtarësim ‘të klasit të dytë’.”
Në klimën aktuale politike dhe ndërkombëtare, sipas Tajanit, duhet bërë më shumë.
“Italia është e përgatitur të kontribuojë në këtë rajon. Kombet e Ballkanit Perëndimor janë partnerë thelbësorë në promovimin e sigurisë ekonomike, përmirësimin e lidhshmërisë, forcimin e zinxhirëve të furnizimit dhe sigurisë ushqimore. Unë jam i mendimit se është e domosdoshme t’i kushtohet vëmendje e plotë zhvillimit të Korridorit 8 dhe Korridorit 10, pasi ato janë thelbësore për integrimin e një pjese më të madhe të Evropës me Ballkanin Perëndimor.”
Qeveria Meloni ka qenë dhe mbetet ndër mbështetëset kryesore të integrimit të shteteve ballkanike në BE.
