Publikimi i videoklipit të këngës së re “Petal” ka sjellë reagime të shumta për Ariana Granden, pasi disa prej fansave janë shprehur të shqetësuar për pamjen e saj tepër të dobët.
Në videon e re, ylli 33-vjeçar i muzikës pop interpreton Pepper, një artiste që synon të bëhet e famshme duke marrë pjesë në një varg audicionesh. Rrëfimi ka nota satire dhe e vendos personazhin e Grandes përballë drejtuesve me ndikim në industrinë muzikore, të cilët e refuzojnë dhe e kritikojnë vazhdimisht.
Pas një tjetër audicioni të pasuksesshëm, në një prej skenave drejtuesit e studios përdorin etiketime të rënda ndaj personazhit të saj. Ata i kërkojnë të “gjejë veten e vjetër” dhe të kthehet për të provuar përsëri. Më tej, ngjarjet marrin një drejtim më të zymtë, ndërsa klipi mbyllet me një skenë simbolike hakmarrjeje.
Pavarësisht mesazhit artistik të videos, një numër i madh ndjekësish e përqendruan vëmendjen te fiziku i këngëtares. Në rrjetet sociale, disa prej tyre thanë se Grande dukej jashtëzakonisht e dobët, ndërsa pamjen e saj e cilësuan “tronditëse” dhe “zemërthyese”.
“Është sikur të shikosh Karen Carpenter dhe të gjithë thjesht ngrenë supet”, shkroi një përdorues. Edhe persona të tjerë ngritën pikëpyetje dhe shprehën shqetësim lidhur me shëndetin e artistes.
Nga ana tjetër, këngëtarja është mbështetur nga një pjesë e fansave, të cilët kundërshtuan komentet për trupin e saj. Sipas tyre, gjendja shëndetësore e një personi nuk mund të vlerësohet vetëm duke u nisur nga dukja e jashtme.
Grande i ka trajtuar edhe më herët komentet që lidhen me peshën dhe paraqitjen e saj. Gjatë një interviste në vitin 2024, ajo deklaroi se njerëzit shpesh e konsiderojnë veten të lirë të japin mendime për trupin e të tjerëve, sjellje që, sipas saj, mund të shkaktojë dëm.
