Një ngjarje aspak e zakontë ka ndodhur në autostradën Tiranë-Vlorë në një furgon të linjës, ku një qytetar është ngritur në këmbë e ka sulmuar shoferin. Për pasojë ky i fundit ka devijuar dhe mjeti është goditur me bordurën anësore të rrugës. Ngjarja ka ndodhur pak pasi kalon urën e kthesës për në Spille në Kavajë.
“Do ju vras të gjithëve”, kështu mësohet të ketë thënë burri, rreth 55 vjeç, i cili ka nisur të përleshet dhe me pasagjerët në furgonin e Vlorës. Videoja tregon momentet e panikut mes pasagjerëve, të cilët janë munduar që të neutralizojnë qytetarin, identiteti i të cilit nuk dihet ende.
Ndonëse në media u fol se personi në fjalë ka bërë thirrje ‘Allahu Akber’, nga dëshmitë e pasagjerëve por dhe dëshmitarëve në vendngjarje konfirmohet se ky person vetëm ka kërcënuar. “Zotëria u ngrit në këmbë dhe iu hodh në kokë shoferit. Shoferi devijoi rrugën dhe u përplas me bordurën e rrugës. Pastaj nisi sherri mes pasagjerëve. “Do t’ju vras të gjithëve” tha burri, por nuk bëri thirrje fetare”, raporton për BalkanWeb dëshmitari në vendngjarje.
BW/d.i.
