Në rrjetin social YouTube, në 17 nëntor është publikuar një video në të cilën pretendohet të shihet një anëtar i Shërbimit të Inteligjencës Ushtarake Ruse (GRU) duke i dhënë ryshfet një “agjenti serb, zyrtar i rangut të lartë”.
Në video, sic thotë koha.net, shihet takimi mes dy burrave në një parking makinash, e më pas ata shkojnë drejt një automjeti që i përkiste njërit prej tyre.
“Informatori i dyshuar rus” i jep një qese plastike “agjentit serb”, i cili e fut në automjetin e parkuar. Dy burrat më pas shkojnë në një kafene aty pranë e paskësaj ndahen.
Kur personi, i përshkruar në video si “agjent serb” hyn në makinën e tij dhe hap qesen plastike të marrë nga informatori rus aty gjen një zarf me para, vazhdon koha.net, duke cituar për këtë pohim edicionin në gjuhën serbe të Radio Europa e Lirë.
Autenticitetin e videos si dhe periudhën kur ajo është filmuar Radio Europa e Lirë nuk ka mundur ta konfirmojë. Por videoja, sipas analizës së bërë nga Christo Grozev, gazetar i platformës së hapur të hulumtimeve “Bellingcat”, tregon zëvendësin e të dërguarit të mbrojtjes të Rusisë në Serbi, anëtar i Shërbimit të Inteligjencës Ushtarake Ruse (GRU).
Grozev thotë se bëhet fjalë për Georgy Viktorovich Kleban, dhe se identiteti i tij është vërtetuar përmes softuerit për identifikimin e fytyrave, “microsoft azure”.
g.kosovari
