Gjykata Kushtetuese ka pranuar pjesërisht ankimin e kreut të Partisë Demokratike, Sali Berisha, duke shfuqizuar vendimin e Kolegjit Penal të Gjykatës së Lartë dhe duke e kthyer çështjen për rishqyrtim në këtë gjykatë, në lidhje me masën e sigurisë “detyrim paraqitjeje” të vendosur nga GJKKO për dosjen “Partizani”.
Siç raporton gazetarja Anila Hoxha, vendimi është marrë me shumicë votash, pas shqyrtimit të kërkesës së Berishës për shfuqizimin e vendimeve të Gjykatës së Posaçme të Apelit dhe Gjykatës së Lartë, të cilat ai i kishte kundërshtuar si të papajtueshme me Kushtetutën.
Në vendimin e saj, Gjykata Kushtetuese ka vendosur shfuqizimin e vendimit të Kolegjit Penal të Gjykatës së Lartë, të datës 22 prill 2025, si të papajtueshëm me Kushtetutën, si dhe dërgimin e çështjes për rishqyrtim në Gjykatën e Lartë.
Kujtojmë se një ditë më parë, tetë gjyqtarët e Gjykatës Kushtetuese u mblodhën për të shqyrtuar kërkesën e Berishës lidhur me masën e sigurisë “detyrim për paraqitje”.
Seanca u zhvillua me dyer të mbyllura dhe pritej që gjykata të merrte një vendim për këtë çështje. Tani pritet edhe zbardhja e vendimit dhe argumentimi i tij nga Kushtetuesja.
Vendimi i sotëm lidhet me ankimin kushtetues të Berishës ndaj vendimeve të mëparshme gjyqësore, ndërsa çështja do të rishqyrtohet tashmë nga Gjykata e Lartë.
