Partia Socialiste kujton sot 30 vjetorin e FRESSH. Ajo që bie në sy është se në videon e shpërndarë nga faqa zyrtare e PS në rrjetet sociale, shfaqet edhe Presidenti Ilir Meta, pavarësisht situatës politike sot dhe përplasjeve të tij me socialistët.
Video nis me Pandeli Majkon, si një i ri i Forumit Rinor Eurosocialist Shqiptar, vazhdon me Edi Ramën, Erion Braçen, Ilir Metën dhe figura të rëndësishme të PS, që nga krijimi 30 vite më parë e deri në ditët e fundit kur socialistët fituan mandatin e tretë.
“Gëzuar ditëlindjen e 30-të FRESSH. Në 15 janarin e vitin 1992 të rinjtë energjikë të Partisë Socialiste themeluan Forumin Rinor Eurosocialist Shqiptar.
Sot, pas 30 vitesh, FRESSH është organizata më e madhe politike rinore në vend dhe vijon të luajë një rol tepër të rëndësishëm si aleati më i mirë i familjes sonë politike.
Misioni dhe aspirata e FRESSH me simbolin e 12 yjeve të Bashkimit Europian, vijon ende sot të jetë i njëjti: anëtarësimi në familjen europiane”, thuhet në mesazhin e shpërndarë bashkë me këtë video./m.j
