Një grupim studentësh kanë zgjedhur një mënyrë krejt origjinale për të protestuar ndaj korrupsionit në universitete.
Në fakultetin e Shkencave të Natyrës u shpalos një banderolë ku shkruhej “Mr 700 euro. Boll i zhvatët studentët”.
Në një postim në rrjetet sociale, Lëvizja për Universitetin që vendosi banderolën shkruan:
“Në vijim të aksioneve ndërgjegjësuese për problematikat e jetës universitare, sot u mbajt aksioni i radhës në Fakultetin – famëkeq – të Shkencave të Natyrës. Aksioni nuk denoncon vetëm zhvatjen që iu bëhet studentëve nga tarifat e larta të studimeve, por edhe zhvatjen me tregtinë e pandershme të librave, dhe më keq akoma në disa raste edhe zhvatjen e studentëve nga disa pedagogë super të korruptuar që shesin me qindra euro një notë provimi.
Aksionet tona do të vazhdojnë derisa të marrin fund tarifat dhe çdolloj haraçi në kurriz të studentëve”.
Studentët nuk kanë publikuar asnjë emër të pedagogut që merr një shumë të tillë eurosh vetëm për një provim.
/a.m.
