Javën e shkuar u përfol shumë në rrjetet sociale një fjalim i deputetes Majlinda Halilaj e cila zëvendësoi Kryetarin e Partisë Demokratike, Lulzim Basha, në Kuvendin e Shqipërisë, pasi ai vendosi të dorëzojë mandatin, pasi ne seance plenare u përpoq të denonconte “Korporatën e Investimeve”.
Pavarësisht se e kishte të shkruar materialin, deputetja nuk arrinte të shqiptonte fjalët siç duhet veçanërisht fjalën “Korporatë”, të cilën ajo e thotë në vijimësi “Koporatë”.
Sot, deputetja është pyetur nga gazetarët jashtë godinës së Parlamentit. E veshur me të zeza, teksa fliste në telefon, Halilaj nuk e uli aparatin në asnjë moment për të shmangur mediat, për të cilat dha dy përgjigje të shkurtra.
“Asgjë nuk ka ndodhur”, tha ajo kur u pyet nga gazetarët se çfarë i kishte ndodhur javën kur ajo mbajti fjalim në Parlament.
Dhe “Probleme ka sa të duash”, iu përgjigj pyetjes se cilat ishin problemet që i kishte ngritur elektorati që e ka votuar në takimin që ka pasur me ta.
Sakaq, pak ditë më parë, Halilaj reagoi me një status në FB për situatën e krijuar nga fjalimi i saj dhe shpjegonte se:
“Per cdo gabim ka nje arsye, nuk gjykohet njeri nga gabimet por nga mendimet qe ka. Sot per arsye shendetesore te problemit me syrin nuk isha e qarte per qytetaret”.
g.kosovari
