Një person vdiq dhe të paktën 40 të tjerë u plagosën kur erërat e forta shkaktuan shembjen e pjesëve të skenës në një festival muzikor në Spanjë.
Pamjet treguan disa pjesëmarrës të festivalit duke vrapuar të panikosur, ndërsa të tjerë shihen duke vazhduar të festojnë në ngjarjen në Cullera, në jug të Valencias.
Festivali i njohur i muzikës elektronike u pezullua pas kësaj.
Tre nga të plagosurit në orët e para të së shtunës pësuan trauma të rënda, thanë shërbimet rajonale të urgjencës.
Dëshmitarët okularë folën për një stuhi rëre të papritur që goditi vendin e festivalit.
Agjencia meteorologjike e Spanjës raportoi për shpërthime erërash që tejkalonin 80 km/h në rajonin bregdetar lindor të vendit në atë kohë.
“Jemi në gjendje shoku”, tha një nga të pranishmit për mediat spanjolle. “Mund të isha unë, mund të ishte kushdo,”
Në një deklaratë në Facebook, organizatorët e festivalit thanë se ishin “të shkatërruar dhe të pikëlluar për atë që ndodhi këtë mëngjes”.
Ata thanë se “erërat e forta të papritura dhe të dhunshme” rreth orës 04:00 me orën lokale kishin shkaktuar dëme në infrastrukturën në vend dhe u mor menjëherë një vendim për të liruar zonën.
