Ndeshja Flamurtari-Partizani, e vlefshme për javën e 34 të Superligës, është shoqëruar me incidente.
Tifozërite e dy ekipeve janë përleshur me njëri-tjetrin, ndërsa ata të ekipit kryeqytetas kanë thyer disa stola dhe i kanë hedhur në drejtim të fushës.
Pavarësisht përplasjes ndeshja nuk është ndërprerë, por ka vijuar normalisht.
Irritimi i tifozëve të Partizanit ka ardhur pas vendimeve të arbitrit të ndeshjes, pasi goli i barazimit për vendasit erdhi pikërisht pas një penalltie të akorduar nga kryesori i takimit, ndërsa ekipi i Starovës kishte kaluar në avantazh me Ekuban në minutën e 32.
Partizani i thotë “lamtumirë” titullit
Takimi përfundoi me rezultatin 1:1, çka do të thotë se Partizani i jep lamtumirë luftës për titullin kampion, pasi rivalët e tij, Skënderbeu dhe Kukësi kanë bërë detyrën duke fituar respektivisht ndaj Tiranës dhe Korabit.
Tirana drejt rënies nga kategoria
Ekipi i Tiranës ka regjistruar humbjen e radhës, këtë herë në transfertën e Skënderbeut të vendit të dytë.
Korçarët fituan me golin e Hamdi Salihit nga penalltia, duke marrë një tre pikësh me shumë vlera në betejën me Kukësin për titullin kampion. Verilindorët kryesojnë me 72 pikë, një më shumë se kampionët ne fuqi.
Ndërkohë që Skënderbeu kërkon trofeun e shtatë radhazi, Tirana rrezikon seriozisht rënien nga kategoria. Ekipi kryeqytetas ka zbritur në vendin e nënë me 35 pikë, çka do të thotë rënie automatikisht një kategori më poshtë. /ReportTV/a.m.
