Ministria e Brendshme përfundon draftin e ligjit për Vetting në Policinë e Shtetit dhe ia kalon atë Kuvendit për miratim.
Burime për Report Tv nga Ministria e Brendshme konfirmuan se tashmë ky draft i është përcjellë Parlamentit dhe pritet të kalojë në komisione për të marrë më pas ok e ligjvënësve.
Të njëjta burime sqaruan se për efektivët, të cilët nuk do të kalojnë Vetingun është parashikuar lirimi nga detyra dhe humbja e gradës në policinë e shtetit. Ata që do të kalojnë të parët në filtrin e kontrollit të pasurisë, anën profesionale dhe kontakteve me elementë kriminalë, proces ky i njohur si Vetting do të jenë drejtori i përgjithshëm i policisë, drejtuesit e policive në qarqe, zyrtarët e lartë të akademisë së rendit si dhe shefat e komisariateve.
Më pas, Vetting do të shtrihet i ndarë në fazë dhe tek efektivët e tjerë të cilët shërbejnë në terren në varësi të drejtorive. Më herët, ishte ministri i brendshëm Fatmir Xhafaj, i cili deklaroi se policia e shtetit do ti nënshtrohej Vettingut dhe brenda dhjetorit me anë të një urdhri ai kërkoi nga vartësit e tij të përgatisnin modalitetet ligjore për të hartuar rregullat e Vettingut në polici.
Gjatë kësaj kohe një pjesë e mirë e efektivëve kanë kaluar një kontroll në lidhje me certifikatat sigurisë për informacionet e klasifikuara, ku sipas burimeve nga ministria e brendshme janë rreth 60 efektivë që se kanë kaluar këtë test.
Për të gjithë ata që do ti nënshtrohen Vettingut bazë do të jenë edhe gjurmët e gishtërinjve që do duhet të dorëzojnë për të kontrolluar të shkuarën e tyre. /b.d
