Që në momentet e para ishte e qartë se nuk bëhej fjalë për një aksident, kur më 6 korrik karabinierët gjetën trupin e 55-vjeçarit shqiptar me kafkën e copëtuar.
Misteri rreth vrasjes së Mikel Rrokut të vrarë në apartamentin e tij në rrugën Verolengo, në Torino, ka arritur në një pikë kthese.
Karabinierët kanë ekzekutuar dy urdhërarreste ndaj një çifti të dyshuar për vrasje të vullnetshme. Të arrestuarit janë 45-vjeçarja Laura Bordello, bashkëshortja e viktimës, dhe 52-vjeçari Duccio Fragiacomo, partneri i ri i gruas.
Njësia hetimore e Karabinierëve ka rindërtuar të gjitha hapat që çuan në vrasjen e Rrokut. Sipas hetimeve, dy të dyshuarit ishin njohur në prill në një qendër kujdesi në San Maurizio Canavese, ku të dy ndodheshin të shtruar.
Gruaja po trajtohej në Qendrën e Shëndetit Mendor, por konsiderohet e aftë për të kuptuar dhe vepruar, ndërsa partneri i saj i ri raportohet se kishte probleme me alkoolin. Lidhja mes tyre nisi në pranverë dhe në maj ata nisën të planifikonin vrasjen, e cila u krye rreth mesditës së 30 qershorit.
Sipas hetimeve, viktima u godit disa herë në kokë me një objekt të fortë, që dyshohet se mund të ketë qenë një çekiç. Arma e krimit nuk është gjetur, ashtu siç nuk janë gjetur as dy telefonat celularë të Rrokut.
Autopsia, së bashku me analizën e pozicionimit dhe morfologjisë së gjurmëve të gjakut të gjetura në kuzhinë dhe në banjën e apartamentit, kanë evidentuar një skenë që, sipas hetuesve, është në përputhje me një akt të kryer me brutalitet dhe dhunë.
Viktima dyshohet se u godit fillimisht nga pas dhe sulmi vazhdoi edhe pasi 55-vjeçari kishte humbur ndjenjat.
Motivi i krimit duket se lidhet me apartamentin e Rrokut në rrugën Verolengo.
“Ajo që del nga bisedat mes dy të dyshuarve është dëshira e gruas për të marrë apartamentin social të caktuar bashkëshortit të saj dhe për të jetuar aty me partnerin e ri”, shpjegoi koloneli Diego Berlingieri, komandant i njësisë operative të Karabinierëve të Torinos.
Sipas hetimeve, çifti kishte vendosur të hiqte qafe Rrokun, edhe pse 55-vjeçari nuk kishte kundërshtuar lidhjen e re të bashkëshortes së tij.
Për të realizuar planin e tyre, ata kishin menduar madje edhe të denonconin viktimën, duke sajuar një rast të rremë keqtrajtimi ndaj gruas.
Përgjimet dhe analizimi i telefonave celularë të dy të arrestuarve kanë nxjerrë në pah elementë që tregojnë për paramendimin e krimit.
“Dua të vras Momon, nuk e duroj dot më”, kishte shkruar Bordello në një bisedë online me një mikeshë.
Një nga hipotezat e para të çiftit kishte qenë vrasja me thikë në një park. Fragiacomo ishte paraqitur i armatosur dhe me doreza metalike, por tentativa kishte dështuar.
Një tjetër mundësi që po shqyrtohej nga dy të dyshuarit ishte helmimi. Për këtë arsye, ata iu drejtuan edhe inteligjencës artificiale.
“Në historikun e kërkimeve në ChatGPT gjendet pyetja: Sa mililitra metadon nevojiten për të vrarë një burrë 56-vjeçar, me peshë 120 kilogramë?”, thuhet në materialet e hetimit.
Pas këtyre përpjekjeve, çifti kishte marrë vendimin përfundimtar: të shkonte në banesën e viktimës me pretekstin se do të merrte rrobat dhe sendet personale dhe më pas ta vriste me “goditje të shumta” në kokë.
Kur kuptuan se hetuesit po afroheshin dhe se ishin nën gjurmimin e autoriteteve, Bordello dhe Fragiacomo nisën të planifikonin arratisjen.
Mes mundësive të shqyrtuara ishte largimi drejt Kanadasë apo vendeve të tjera të Amerikës së Veriut që nuk kanë marrëveshje ekstradimi me Italinë.
Ky plan u pengua nga arrestimi i tyre mëngjesin e së martës, 6 tetor.
