Deputetja e LSI-së, Erisa Xhixho në emisionin Zona Zero në Top News doli kundër nismës së PD-së për të kryer vettingun në politikë. Një qëndrim i tillë shpreh qartë ndasitë që kanë mes dy partive që dikur ishin aleate në zgjedhjet e 25 prillit.
“Nëse më pyet si Erisa Xhixho që je pro që zyrtarët e korruptuar duhet të shkojnë në burg, patjetër që po. Nëse më pyet për propozimin e PD-së, ka qenë një propozim i 2018, cili e ka hedhur poshtë Venecia, komisioni më i rëndësishëm për konsultimet e ndryshme. Po flas për ecurinë e këtij projekti, komisioni i Venecias është shprehur se për nga mënyra se si është hartuar ai ligj ka problemet e tij, e ka hedhur poshtë në një farë mënyre.
Në momentin që funksion sistemi i drejtësisë, SPAK, ILDKP, e ligji antimafia çdo tjetër atëherë nuk ka nevojë për vetting. Propozimet që prekin Kushtetutën duhen parë me seriozitet e më shumë përgjegjësi, duke mos e parë si garë se kush propozon më shumë ndryshimet kushtetuese, e amendimet e propozuara janë fundi i procesit”, tha Xhixho.
Ajo u shpreh se është në luftë frontale me mazhorancën dhe do të bëjë opozitën e saj, duke qenë kështu dhe distancuar nga PD-ja.
“LSI është mjaft qartë e pozicionuar mjaft qartë në opozitë. PD është në një debat të brendshëm, e ta zgjidhë atë, e kështu me radhë, mendoj se LSI ka identitetin e saj, është një forcë socialprogresiste, ne duhet të mbrojmë shtresat në nevojë.
Kemi marrë përgjegjësinë tonë për dorëzimin e mandateve, LSI mendoj se opozita është instrumenti më i rëndësishëm që i duhet vendit. Misioni i madh, të bërit opozitë të fortë, opozitë frontale me këtë mazhorancë”, theksoi Xhixho./m.j
