Ka kaluar vettingun një tjetër zyrtar i Policisë. Bëhet fjalë për z. Arben Dashi, me funksion Drejtor i Drejtorisë Kundër Krimeve ndaj Personit dhe Pasurisë, në Drejtorinë e Përgjithshme të Policisë së Shtetit.
Komisioni i Jashtëm i Vlerësimit i përbërë nga Marjeta Gjelaj, Ela Kerka, dhe Ana Kapaj, ka vendosur konfirmimin në detyrë të Dashit. Sipas raporteve, ai ka bërë deklarim të rregullt të pasurisë dhe nuk ka të dhëna që ka lidhje të papërshtatshme me botën e krimit.
Arben Dashi ndodhet në polici që prej vitit 1985. Ka pasur një shkëputje 5-vjeçare. Gradën drejtues i parë e ka marrë para kohe. Subjekti u justifikua me faktin se ka mbajtur për 19 vite rresht gradën kolonel që është ekuivalente me gradën drejtues. Ka certifikatë për shërbime të dalluara.
Vetë ai u shpreh gjatë seancës se është dakord me gjetjet e komisionit. “Kam punuar që në vitin ’85. Kam punuar në vende si Laç, Krujë ku ashpërsia e krimit është e madhe. Detyrën e kam kryer me integritet. Kam qenë shef në disa komisariate dhe drejtor i disa qarqeve dhe në poste drejtuese në Drejtorinë e Përgjithshme. Kam pasur bashkëpunim me kolegët”, deklaroi ai.
I pyetur se çfarë mendon për kurbën e kriminalitetit, Dashi tha: “Ka pasur ulje të kriminalitetit nga viti në vit. Ka një ulje rreth 50% të vrasjeve. Janë goditur grupe kriminale me vrasës me pagesë në Vlorë, Tiranë dhe Elbasan. Janë goditur dhe grupe të grabitësve si p.sh. ajo e babagjyshëve. Kjo ka ulur kriminalitetin”.
Sa i përket motiveve të vrasjeve, Dashi tha se një ndër shkaqet kryesore është veprimtaria në fushët narkotike në vendet e Europës por pasojat ndodhin në Shqipëri. Problem është dhe vrasja në familje. “Po punojmë për parandalimin. Kemi caktuar zonat problematike, Vlorë, Shkodër, Elbasan, Tiranë dhe po punojmë për uljen e kriminalitetit”, tha ai. /e.s/
