Lëvizja Vetëvendosje i ka kërkuar presidentes Vjosa Osmani që të flasë për dallimet që mund të ketë me kryeministrin Albin Kurti apo ministren e Jashtme, Donika Gërvalla.
Në konferencën e subjektit më të madh politik në Kosovë në përmbyllje të sesionit vjeshtor të Kuvendit, u tha se dallimet mes krerëve nuk janë substanciale.
“Unë nuk besoj se ka dallime, nuk do të duhej të kishte për sa kohë që s’janë të artikuluar s’mund t’i diskutojmë në kuptimin as mediatikisht por besoj që nuk ka dallime substanciale”, tha Adnan Rrustemi
deputet i LVV.
Duke cituar ligjin dhe duke arsyetuar mungesën e kryeministrit Kurti në takimin konsultativ për datën e zgjedhjeve, në këtë konferencë u tha se i takon subjektit politik kë e dërgon në takim te presidentja ndërsa lanë për të kuptuar se ende nuk e kanë dërguar datën e tyre të preferuar.
“I përket partive politike të përcaktojnë përfaqësuesit e tyre për të shprehur qëndrimin në këto takime. Konsultimet do të vazhdojnë se ka afat ende në këtë drejtim unë kam qenë për një kohë të gjatë në KQZ dhe presidentja ka më shumë se një muaj në dispozicion për t’i zhvilluar konsultimet deri në caktimin e datës së zgjedhjeve”, tha Rrustemi.
Po ashtu, u mbrojt qëndrimi i Kurtit edhe për hapjen e Urës së Ibrit duke thënë se nuk ka asnjë argument për mbajtjen e urës mbyllur.
“Në asnjë argumentim nuk mund të gjendet një kauzë e mirëfilltë për parandalimin e hapjes së urës (së Ibrit). Po flasim për lëvizjen e lirë dhe domosdoshmërinë e normalizimit të jetës në atë pjesë të Kosovës. Ura ka mbetur si sinonim i bllokadës dhe i një kuazi ndarje që është pretenduar të bëhet vite më parë. Megjithatë të gjitha rreziqet që janë asociuar me mbylljen e urës, tashmë po i shohim se janë të eliminuara”, u shpreh Mimoza Kusari – Lila, LVV.
Kundër hapjes së urës që bashkon Mitrovicën janë shprehur ambasadorët e vendeve të QUINT-it si dhe Bashkimi Europian.
