Hetimet zbulojnë se Erzen (Hamza) Uka dhe Julian (Adem) Cumraku, të arrestuar për dyshime për përgatitje sulmi terrorist, nuk vepronin të vetëm. Ata kanë pasur mbështetje nga një person i tretë, i dallueshëm për flokët e gjata dhe pantallona kamuflazhi, i cili ka udhëtuar shpesh nga Tirana dhe ka qëndruar me ta në zonat e Fushë-Arrëz dhe Orosh.
Ky individ është parë duke kryer aktivitete si prerja e druve, pa frekuentuar dyqanet lokale dhe duke ruajtur një profil të fshehtë. Uka dhe Cumraku i rezistuan 12 orë forcave RENEA, duke u ngujuar në një kullë të pabanuar në fshatin malor Orosh, ku dyshohet se jetonin prej rreth një muaji. Ata nuk kanë folur para hetuesve, duke deklaruar se vetëm “Zoti mund t’i gjykojë”.
Kontrolli në banesën e tyre zbuloi një arsenal të plotë: katër armë automatike, një pistoletë, 17 granata dore difensive, rreth 2 mijë fishekë, kapsolla detonatore, fitil zjarr përcjellës dhe një flamur të ISIS-it.
Dyshja frekuentonin një xhami në fshatin Kryezi, e cila nuk është nën kontrollin e Myftinisë së Pukës. Prokuroria e Shkodrës po i heton për nxitje dhe propagandë terroriste, prodhim armësh luftarake, kundërshtim të policisë dhe mbajtje pa leje të armëve dhe municionit.
