Edhe pse ishte projekt i shtrenjtë ndërtimi i autostradës “Ibrahim Rugova”, pjesa më e madhe e saj qe një kohë të gjatë mbetet e pa ndriçuar dhe kjo po shkakton telashe për drejtuesit e automjeteve që po ndikon edhe në pasigurinë dhe shtimin e aksidenteve në këtë auto-rrugë.
Errësira në autostradë ka ardhur si rezultat i vjedhjeve të kabllove nga qytetarët e pa ndërgjegjshëm. Parandalimi i kësaj dukurie negative mund të ndodhë vetëm pas koncesionimit të autostradës për mirëmbajtje, mirëpo, sipas Ministrit të Infrastrukturës Lutfi Zharku, koncesionimi do të ndodhë vetëm atëherë kur të shihet ndikimi i koncesonimit në pjesën e Shqipërisë dhe pas përfundimit edhe të autostradës “Arbër Xhaferi”.
Ministri Zharku për KosovaPress pranon se për ndriçimin e autostradës ka shumë probleme sa i përket vjedhjeve të kabllove dhe gjërave tjera përcjellëse në mënyra të ndryshme. Ai thotë se është turp për ata qytetarë që e vjedhin pasurinë publike. Megjithatë, sipas tij masat që po i ndërmarrë polici dhe ministria për mirëmbajtje më të rregullta të autostradës po ndikon q ë të ketë një situatë më të mirë.
“Duhet ta pranojmë se kemi shumë probleme sa i përket vjedhjeve që bëhen në autostradë qoftë pusetave, qoftë kabllove të ndryshme. Kjo është një e metë apo një veti, të mos themi një turp jo vetëm për ne që udhëheqim por për gjithë popullatën që ta vjedhim pasurinë tonë publike në mënyrën e tillë. Megjithatë, masat që po i ndërmarrim qoftë nga ana e Policisë së Kosovës, qoftë nga Ministria me mirëmbajtjen më të rregullta të autostradës po ndikojnë që të kemi një situatë më të mirë”, thotë ministri Zharku.
Zharku thotë se kanë menduar që për mirëmbajtjen e autostradës të aplikohet metoda e koncesionimit, por në fakt, siç tha ai po presin të shohin se si do të ndikojë koncesionimi në fluksin e udhëtarëve në pjesën e Shqipërisë dhe pastaj të fillojnë përgatitjet edhe në pjesën e Kosovës.
Sipas ministri të Infrastrukturës përgatitja e koncesionimit do të fillojë edhe pas përfundimit të autostradës “Arbër Xhaferi”, siç u shpreh ai në një pako të përbashkët e koncesionimi.
“E kemi menduar çështjen e koncesionimit, por në realitet jemi lidhur në atë që së pari ta shohim se si po ndikon koncesionimi në fluksin e udhëtarëve në pjesë e Shqipërisë dhe tek pastaj të përgatitemi edhe në anën tonë. Kështu që do të përgatitemi pas përfundimit të autostradës “Arbër Xhaferi”, ta kemi një pako të dhënies me koncesion edhe autostradën “Arbër Xhaferi” dhe pjesën që kemi të bëjmë me autostradën “Ibrahim Rugova”, thotë Zharku.
Megjithëse ministri Zharku thotë se kanë edhe një problem tjetër për të filluar me pagimin e autostradës nga drejtuesit e automjeteve. Sipas tij, segmenti i autostradës nga Prishtina deri në Gjurgjicë është një problem në vete, ngaqë siç u shpreh ai në momentin e vendosjes së taksave për autostradë duhet të ketë edhe një rrugë për lëvizjet alternative të të gjithë qytetarëve.
Ndërsa, lidhur me vjedhjet, Policia e Kosovës thotë se kanë kapur në flagrancë kryesit e këtyre veprave dhe konform proceduarve ligjore kanë ndërmarrë masa për sjelljen e tyre para organeve të drejtësisë.
Zëdhënësi i Policisë së Kosovës, Daut Hoxha për KosovaPress thotë se sa i përket statistikave të rasteve të vjedhjeve në autostradë të raportuara në polici janë të shpeshta. Sipas tij, në vitin 2015 ka pasur tri r aste, ndërsa në vitin 20144 raste tilla.
“Policia e Kosovës gjatë realizimit të detyrave dhe aktiviteteve policore shpesh herë ka hasur edhe në rastet e tilla, ku janë kryer vjedhje në autostradë, respektivisht kemi pasur raste ku kemi kapur në flagrancë kryesit e këtyre veprave dhe konform proceduarve ligjore kemi ndërmarrë masa për sjelljen e tyre para organeve të drejtësisë… Sa i përket statistikave të rasteve të vjedhjeve të raportuara në polici, ne në vitin 2015 kemi tri raste, ndërsa në vitin 2014 kemi pasur 4 raste tilla”, thotë Hoxha.
Ai thotë se zyrtarët e policës i kanë adresuar këto raste në stacionet përkatëse dhe procedurat ligjore kanë filluar kundër këtyre personave të involvuar në këto vjedhje. Hoxha thotë se në bazë të numrit të aksidenteve në autostradë, gjatë vitit 2015 ka pasur gjithsej shtatë aksidente fatale, me lëndime 106 aksidente, ndërsa me dëme materiale ka pasur 248 raste të aksidenteve.
“Sa i përket numrit të aksidenteve mund të theksoi se ne në autostradë kemi pasur gjithsejtë shtatë aksidente fatale, me lëndime kemi pasur 106 aksidente, ndërsa me dëme materiale kemi pasur 248 raste të aksidenteve. Nga janari deri në dhjetor të vit të kaluar është një trend i zhvillimit të njëjtë të aksidenteve të ndodhura në autostradë”, thotë Hoxha.
Ai thotë se në bazë të statistikave hajdutët e kabllove kryesisht janë shtetas kosovar. Vjedhjet më të shpeshta janë në rrethinën e Malishevës, Suharekës dhe Obiliqit./kosovapress/
