Skënderbeu fiton titullin, Partizani e Kukësi sigurojnë pjesëmarrjen në Europa League, Bylis shoqëron Tërbunin një kategori më poshtë.
Këto janë verdiktet e kampionatit, pas javës së 36-të e të fundit të tij, ndërkohë që Teuta është në pritje të finales të Kupës së Shqipërisë, për të parë nëse do të mund të luajë edhe ajo në Europa League. Skuadra durrsake zuri vendin e katërt, me pikë të barabarta me Kukësin. Nëse ky i fundit fiton Kupën, atëherë luan në Evropë si fitues i saj dhe një nga dy vendet e kampionatit për Europa League i shkon Teutës. Në rast se fitues i Kupës del Laçi, shkon ky në Europa League, bashkë me Partizanin e Kukësin.
Titulli i fituar nga Skënderbeu është i gjashti radhazi, si askush në histori. Skuadra e Josës ka thyer rekordin e saj, pasi vitin e kaluar vendosi rekordin me pesë tituj radhazi, ndërkohë që i mëparshmi mbahej nga Dinamo, me katër, në vitet 1950-53.
Gjithjes janë shtatë tituj për Skënderbeun që konfirmohet si skuadra e pestë historike e futbollit shqiptar për sa u përket titujve të fituar. Para Skënderbeut qëndron Tirana, me 24 tituj, e ndjekur nga Dinamo me 18, Partizani me 15 dhe Vllaznia me nëntë. Duke parë zhvillimet e viteve të fundit, nuk do të ishte aspak çudi që fitues në vazhdimësi të ishte përsëri Skënderbeu, i parivalizuar nga fuqitë tradicionale, përveç Partizanit të sivjetëm, ndërsa Tirana e Vllaznia janë larg emrit, për të mos folur për Dinamon, e cila nuk është fare në Kategorinë Superiore.
Fitorja e titullit është shumë e rëndësishme për financat e skuadrës, për shkak të pjesëmarrjes në Champions League, me formulën e ndryshuar, e cila krijon shanse të mëdha për të shkuar deri në play-off, çka siguron automatikisht të paktën pjesëmarrjen në fazën në grupe në Europa League, siç ndodhi edhe në sezonin që sapo u mbyll me Skënderbeun.
Me formulën e ndryshuar me nismën e ish-presidentit Michel Platini, në raundet eliminatore skuadrat kampione ndeshen vetëm me skuadra kampione, duke shmangur në këtë mënyrë përballje me gjigantë të pakalueshëm si Manchester City, Roma, Borusia Mënshengladbah, Monaco e të tjerë. Me pak fat, shorti të vë përballë skuadra plotësisht të kalueshme, gjë që Skënderbeu e shpreson edhe sivjet, për të fituar të tjera miliona euro nga ndeshjet në Champions League e mundësisht më pas edhe në grupet e Europa League.
Dritan Ikonomi
