Partia Demokratike ka reaguar pas vendimit të Gjykatës së Tiranës, e cila la të lirë ish-kryebashkiakun e Kavajës, Elvis Roshi, lidhur me falsifikimin e konstatuar në formularin e dekriminalizimit.
Ai u dënua sot me 60 orë punë për komunitetin, pasi përfitoi nga gjykimi i shkurtuar.
Por për Partinë Demokratike, vendimi i sotëm për ish-kryebashkiakun e Kavajës, i shkarkuar si pasojë e ligjit të dekriminalizimit, është një provë e qartë se Edi Rama nuk e ka seriozisht procesin e dekriminalizimit.
“Njësoj shpëtoi nga burgu edhe deputeti tjetër mik i Edi Ramës, Tom Doshi. PD që në fillim ka bërë të qartë se emërimi antikushtetues i Prokurores private politike Arta Marku nga Edi Rama u bë për të shpëtuar nga burgu atë, ministrat e tij të korruptuar dhe kryebashkiakët e tij të lidhur me krimin e organizuar. Arta Marku, njësoj si Edi Rama, konstatoi në pretencën e prokurorisë se Elvis Roshi është një qytetar i nderuar dhe pa rrezikshmëri shoqërore. Prandaj i kërkon gjykatës që ta falë dhe të mos e çojë në burg”, thuhet në qëndrimin e PD.
Më tej nënvizohet se Elvis Roshi është i dënuar në Itali për veprën e rëndë penale “përdhunim në grup”, si dhe ka disa procedime penale në Gjermani, Zvicër e Itali për trafik droge.
PD deklaron se vendimi i sotëm i prokurorisë është një tjetër provë se Arta Marku është në shërbim të Edi Ramës, “për të shpëtuar nga burgu të gjithë anëtarët e bandës së tij kriminale, me të cilët erdhi në pushtet dhe po mban pushtetin”.
Po ashtu thuhet se, vendimi i sotëm i organeve të drejtësisë është një tjetër provë që reforma në drejtësi u përdor nga Edi Rama për të kapur politikisht sistemin gjyqësor, për hallin e tij personal dhe për hallet e bandës së tij kriminale./a.m.
