Vëllezërit Aliko u morën në pyetje nga prokurorët e Krimeve të Rënda në ambientet e Drejtorisë së Policisë së Tiranës, në lidhje me vrasjen e efektivit të RENEA-s, Ibrahim Basha.
Marrja në pyetje e Arbion dhe Alban Aliko, të cilët dyshohen si autorët e vrasjes së policit, u bë në prani të avokatit të tyre.
Dy vëllezërit Aliko sillen në Tiranë në masa të forta sigurie
Sillen në Tiranë nën masa të forta sigurie dy vëllezërit e arrestuar mbrëmë në Lazarat, Arbion dhe Alban Aliko. Dy personat më të kërkuar nga policia gjatë ditëve të fundit, lidhur me vrasjen e efektivit të RENEA-s më 24 qershor, gjatë aksionit të policisë për kapjen e ‘grupit të zjarrit’.
Dy të akuzuarit si përgjegjësit kryesorë për vrasjen e Ibrahim Bashës, u sollën rreth orës 02.00 të mëngjesit të së dielës në ambientet e Policisë së Tiranës, ku janë marrë në pyetje nga grupi hetimor.
Rrugëtimi nga Gjirokastra deri në Tiranë është bërë nën masa shumë të rrepta sigurie, për shkak jo vetëm të rrezikshmërisë së dy vëllezërve, por edhe të grupit të tyre.
Arbion dhe Alban Aliko mësohet se i kanë sjellë deri në Tiranë të veshur me antiplumba dhe me skafandra. Edhe gjatë ditës së sotme pritet që të vijojë marrja e tyre në pyetje nga grupi hetimor.
