Një shans historik për qytetarët e ka quajtur kandidati i koalicionit të majtë për Tiranën, Erion Veliaj, bashkëpunimin e nevojshëm midis bashkisë dhe ALUIZNI-t për çështjen e legalizimeve. Në takimin e sotëm, ku së bashku me Kryeministrin Edi Rama dhe drejtorin e ALUIZNI-t, Artan Lame, u shpërndanë 1001 legalizime për zonat informale të Kryeqytetit, Veliaj e vuri theksin te gjetja e gjuhës së përbashkët midis dy institucioneve kyçe, gjë e cila ka munguar në dy vitet e fundit.
“Për Tiranën është shans historik që bashkia dhe ALUIZN-i të jenë në të njëjtin krah, që kryetari i bashkisë dhe kryetari i ALUIZNI-t të punojnë si një ekip”, tha Veliaj. Ai shprehu nevojën për një angazhim për t’i dhënë zgjidhje çështjes së legalizimeve në të gjithë Tiranën, por në mënyrë të veçantë për ato ndërtime, legalizimi i të cilave është bërë i pamundur këto vite për shkak të mosbashkëpunimit të bashkisë aktuale.
Nga ana tjetër, ai ka garantuar vullnetin e tij për të bashkëpunuar me ALUIZN-in, pasi siç u shpreh ai, kjo është në interes të gjithë atyre qytetarëve, të cilët për arsye të ndryshme, edhe pas kaq shumë vitesh, nuk kanë mundur ta legalizojnë banesën e tyre. “Premtimi ka qenë që ne do të kemi një bashki dhe një ekip, i cili shkon në drejtimin e duhur me ALUIZN-in, i cili ecën në drejtimin e duhur me legalizimet, e që këto të jenë në drejtimin e duhur me urbanizimin e qytetit”, u shpreh Veliaj.
Në total, bashkia e re e Tiranës me kufinjtë e rinj ka afro 60 mijë ndërtime për t’u legalizuar. Drejtori i ALUIZN-it, Artan Lame, duke vlerësuar se marrëdhëniet me administrtarën lokale të sotme janë inekzistente, ka kërkuar bashkëpunimin e bashkisë së re për t’i dhënë zgjidhje një problemi i cili i prek afro 20 mijë apartamente në Tiranë.
