Kryetari i ri i Bashkisë së Tiranës, Erion Veliaj, me marrjen zyrtarisht të detyrës së tij më të re, lëvizjen e parë të tij me shumë mundësi do të ketë zgjedhjen e nënkryetarëve të bashkisë që pritet të jenë katër si dhe 24 administratorë që do të jenë në çdo minibashki apo komunë që është bërë pjesë bashkisë.
Në fjalën e tij në dakrën për gazetarët, Veliaj lë të kuptohet se tashmë e ka zgjedhur krahun e tij të djathtë dhe bashkëpunëtorët që do ta asistojnë në detyrën e tij të re, dhe siç thekson ai do të jenë persona që do të duhet të punojnë për kryeqytetin që fle prej 4 vitesh.
Ai nënvizoi se nuk do të shohë aspak siglën e partisë, por mjafton që individi t’i shërbejë qytetarëve.
“Nuk do të kenë sigël partie. Ata do të përzgjidhen njëlloj si kandidatët që dolën në siglën e koalicionit Aleanca për Shqipërinë Evropiane. Besoj se kam dëshmuar që nuk prirem të shikoj njerëzit nga bindjet politike. Prirem të punoj me menaxherë të mirë. Fati kësaj here është që kryetari i bashkisë zgjidhet, punon me menaxherë të cilët i emëron ose i shkarkon në bazë të performancës së tyre. Ashtu siç arritëm të ngrinim performancën në një ministri që ishte bishti i kavallit dhe për të cilën askujt nuk i binte në mend, as nuk e dinte me çfarë merrej, gjykoj se do të sjellim në të njëjtin standard dhe të njëjtin nivel Bashkinë e Tiranës, që ka katër vjet që fle gjumë me gërrhima”, deklaroi kreu i ri i bashkisë.
