Kryetari i Bashkisë së Tiranës, Erion Veliaj, ka prezantuar sot administratorët e Njësisë 8 dhe 9, Erjon Xhafa dhe Adelina Albrahimi.
Në fjalën e tij, Veliaj u shpreh se “investimi më i rëndësishem për Tiranën, por që prek në mënyrë të drejtpërdrejtë njësitë nr. 8 dhe nr. 9, është projekti i Parkut Qendror dhe ai i Lumit të Tiranës. Njerëzit duhet të bëjnë ato çka premtojnë dhe kjo është ajo që premtuam: Kemi rënë dakord me kompaninë britanike që në projektin e bulevardit të ulet intensiteti i ndërtimeve dhe te rriten hapësirat e gjelbra”.
Veliaj theksoi se “tashmë ka filluar puna për pastrimin e Lumit të Tiranës, si pjesë e projektit të Parkut që do të përfshijë edhe këtë zonë. Kemi filluar punën në zonën e lumit të Tiranës, për të shtuar parkun e lumit të Tiranës. Sapo jemi dakordësuar me Fondin e Abu Dhabit, që të fokusohemi te projekti me më shumë parqe dhe hapësira të gjelbra, me një park qendror, rreth 6-7 herë sa Parku Rinia dhe me më pak ndërtime në këtë zonë”.
Kryetari i Bashkisë së Tiranës, Veliaj, ka realizuar një nga premtimet e tij të para fushatës elektorale, rehabilitimin urban të bllokut të pallateve që kufizohet nga rruga “Ferit Xhajko” në Njësinë Administrative nr. 8. Veliaj pa nga afër punën e kryer në këtë bllok pallatesh, ndërsa u ndal të bisedonte edhe me banorët e lagjes, të cilëve u kërkoi të mirëmbajnë investimin e kryer nga bashkia.
Gjithashtu, Veliaj bëri një bilanc te punës së Bashkisë së Tiranës në katër javë të drejtuar nga ai dhe u shpreh se “Në vetëm katër javë kemi mbyllur këtë investim në një zonë shumë problematike të Tiranës. Dua t’u bëj thirrje të gjithë qytetarëve se rregullimi i qytetit kushton, por kushton më pak nëse të gjithë e ruajmë atë që investojmë. Tashmë, falë punës së kryer, janë larguar të gjitha objektet që kishin zënë hapësirat publike, si dhe janë ndërtuar lulishte dhe kënde lojërash për fëmijët, ashtu siç premtova gjatë fushatës elektorale”.
Nisur nga ky investim, kreu i bashkisë ka kërkuar nga banorët që të mos dëmtojnë pronat e përbashkëta dhe të bëhen partnerë me bashkinë për të mbajtur të pastër ambientin.
