Ka vdekur lideri i rebelëve serbë të Kroacisë, Goran Haxhic, i akuzuar për krime lufte nga Gjykata e Kombeve të Bashkuara për rolin e tij në luftën e Kroacisë për pavarësi nga vitet 1991 deri më 1995.
Hagjic ka vdekur më 12 korrik në moshën 57 vjeçare, ndërsa lajmi është publikuar nga agjencia shtetërore serbe e lajmeve, Tanjug.
Vdekja e Haxhic është konfirmuar nga spitali rajonal i Vojvodinës duke thënë se ai vdiq pas një “sëmundje të rëndë”, transmeton rel.
Hagjic është përballur me 14 akuza për krime lufte dhe krime kundër njerëzimit rreth dyshimeve të përfshirjes së tij në deportimin dhe vrasjen e mijëra civilëve jo serbë nga Kroacia në mes viteve 1991 – 1993.
Në muajin prill, gjykatësit në Tribunalin e Hagës për krimet në ish Jugosllavi kanë thënë se e kanë shtyrë gjykimin e Haxhic për shkak të sëmundjes së kancerit në tru të të dyshuarit.
Ai është arrestuar në Serbi në vitin 2011 pas shtatë vitesh arratie, ndërsa procesi gjyqësor kundër tij ka filluar në tetor të vitit 2012.
Prokurorët e kanë përfunduar prezantimin e rastit kundër tij në nëntor të vitit 2013, ndërsa mbrojtja sapo e kishte filluar prezantimin e të dhënave të tyre kur ai ishte diagnostikuar me kancer, në vitin 2014. (b.an)
