Një i dënuar me burg, i cili vuante nga kanceri, ka ndërruarf jetë dje në spitalin “Nënë Tereza”. 22-vjeçari nga Fieri ishte dënuar me pesë vjet për armëmbajtje pa leje, por familja kishte kërkuar lirimin pasi ai ishte diagnostikuar me sëmënudjen e pashërueshme. Artur Meçe u transferua pak ditë më parë në spital, për shkak të përkeqësimit të gjendjes, por nuk mundi të jetonte më tepër.
Ai u shtrua në kardiologji, për shkak se kishte edhe probleme kardiake, të cilat ishin shkaku i vdekjes, shkruan gazeta Panorama.
Rasti i Artur Meçes u bë publik edhe në media gjatë muajit shtator, kur familjarët e tij, por edhe qytetarët e Fierit, kërkonin lirimin nga burgu të 22-vjeçarit, pasi sipas tyre i kishte ditët e numëruara. Në një protestë të zhvilluar 3 muaj më parë, familjarët i kërkonin presidentit lirimin e Arturit.
Pasi protestat u transmetuan në media të ndryshme, thirrjes së familjarëve iu bashkuan edhe bashkëvuajtësit e 22-vjeçarit në këtë burg, të cilët për disa ditë refuzuan vaktet e ushqimit. Familja Meçe nga fshati Mbrostari i Fierit kërkoi vazhdimisht lirimin e djalit, pasi kërkonin që ta mbanin në shtëpi gjatë ditëve të fundit të jetës. Ata i bënin apel Drejtorisë së Burgjeve dhe Presidencës që i riu t’i kalonte ditët e mbetura pranë familjes. Nëna e tij, Mimoza Meçe tregonte se doktorët e kishin diagnostikuar me kancer në mushkëri, por ai kishte edhe probleme në zemër.
Megjithëse pas kërkesës, Drejtoria e Burgjeve tha se kishte vënë në dijeni për rastin Gjykatën dhe Prokurorinë, nuk erdhi asnjë vendim konkret, qoftë edhe për lehtësimin e kushteve të vuajtjes së dënimit, deri sa ai u nda nga kjo botë.