Shqipëria po fiton vëmendje si një destinacion i ri mesdhetar, me më pak turma turistësh dhe me çmime më të ulëta. Revista amerikane e udhëtimeve “Travelbinger”, në vend të Italisë, sugjeron Shqipërinë si një destinacion gati 70% më pak të shtrenjtë dhe me një eksperiencë të ngjashme mesdhetare.
Një nga asetet më të forta të vendit është Riviera Shqiptare, që shtrihet nga Vlora deri në Sarandë, me mbi 120 kilometra vijë bregdetare. Ujërat e kristalta të Jonit, plazhet e paprekura dhe fshatrat bregdetare me atmosferë të qetë po e kthejnë këtë zonë në një nga destinacionet më të kërkuara në Europën Juglindore. Plazhet shqiptare krahasohen shpesh me ato të Greqisë apo të rivierës italiane, por me çmime dukshëm më të ulëta.
Por, nga ana tjetër, në artikull shkruhet se Shqipëria, ky sekret ballkanik, nuk do të mbetet i tillë për shumë gjatë.
Sepse, me shtimin e interesit ndërkombëtar, çmimet po rriten gradualisht. Ekspertët paralajmërojnë se kjo periudhë “e artë” e çmimeve të ulëta mund të mos zgjasë shumë. Ashtu siç ndodhi me Kroacinë dhe Portugalinë vite më parë, rritja e popullaritetit sjell edhe rritje të kostove.
Për turistët që kërkojnë diell, det, histori dhe gastronomi autentike me buxhet ekonomik, Shqipëria dhe Ballkani përfaqësojnë sot një nga alternativat më të mira turistike në Europë.
