Thomas J. Pritzker, një nga figurat më të njohura të biznesit amerikan, ka njoftuar dorëheqjen e tij të menjëhershme nga posti i kryetarit ekzekutiv të Hyatt Hotels Corporation.
Vendimi vjen pas publikimit të dosjeve të Departamentit të Drejtësisë së SHBA-ve, ku zbulohet lidhja e tij e gjatë me financierin e ndjerë të dënuar për krime seksuale Jeffrey Epstein dhe bashkëpunëtoren e tij Ghislaine Maxwell.
Siç shkruan The New York Times, në letrën drejtuar bordit të Hyatt, 75 vjeçari shprehu keqardhje për kontaktet e tij me çiftin Epstein-Maxwell, duke pranuar se kishte patur një “gjykim të tmerrshëm” dhe se duhej të ishte distancuar më herët.
Dokumentet e publikuara tregojnë se Pritzker ka patur një komunikim të rregullt me Epstein-in edhe pas dënimit të tij në vitin 2008, duke u takuar shpesh në rezidencën e tij në Manhattan.
Në një shkëmbim emailesh të vitit 2018, Epstein i kërkoi Pritzker-it të ndihmonte të dashurën e tij për një udhëtim në Azinë Juglindore, ku ajo tha se “do të përpiqej të gjente një të dashur të re për Jeffrey-n”. Pritzker iu përgjigj me humor, duke përdorur një emoji buzëqeshjeje.
Në një shkëmbim tjetër, nga viti 2015, ndërsa po bënin plane për t’u takuar, Epstein bëri shaka për kombinimin e planeve të tyre: “Do të ishte argëtuese të takoheshin Dalai Lama dhe Woody Allen për drekë të shtunën, mund të ishte një ngjarje e paharrueshme.”
Pas dorëheqjes, Pritzker ka deklaruar se nuk do të rikandidojë për bordin e Hyatt në mbledhjen e aksionarëve në maj. Bordi ka emëruar presidentin aktual të kompanisë, Mark S. Hoplamazian, si kryetar të ri.
Në një deklaratë zyrtare, Hyatt falënderoi Pritzker-in për kontributin e tij në strategjinë dhe rritjen afatgjatë të kompanisë, duke e cilësuar udhëheqjen e tij si “instrumentale” për zhvillimin e markës.
