Kur kanë kaluar 10 ditë nga vdekja që tronditi mbarë opinionin publik, Prokuroria, Policia dhe Agjencia e Mbikëqyrjes Policore nuk kanë ende një përgjigje konkrete për një sërë pyetjesh që janë ngritur për mënyrën se si ndërroi jetë 32- vjeçari, Lear Kurti.
Ndonëse AMP-ja ka tentuar disa herë të japë të dhëna që lidhen me përgjigjen që ka dalë nga Mjekësia Ligjore për shkaqet e vdekjes së të riut, duket se Prokuroria ka vendosur ta çojë në fund hetimin për të zbardhur gjithë procedurën që lidhet me ngjarjen e rëndë, e cila ndodhi në duart e efektivëve të Komisariatit nr.3 në Tiranë. Sipas të dhënave më të reja, është mësuar se në pyetje janë marrë një sërë mjekësh dhe personeli që ka qenë natën e ngjarjes në shërbim në Spitalin e Traumës.
Ata janë thirrur të dëshmojnë jo vetëm mbi pretendimet e punonjësve të Policisë, të cilët thanë se e kanë çuar gjallë në spital të prangosurin e tyre, por edhe për të verifikuar të gjithë praktikën mjekësore që u ndoq me të ndjerin. Ndonëse vetë Spitali i Traumës të nesërmen e ngjarjes e përgënjeshtroi menjëherë deklaratën e Policisë në lidhje me këtë fakt, duke dëshmuar se i prangosuri kishte ardhur pa shenja jete në spital, prokurorët kanë kërkuar t’u vihen në dispozicion edhe pamjet filmike të të gjithë procedurës që është ndjekur me të ndjerin para se sa të nisej për në morgun e Tiranës.
HETIMI
Prokuroria e Tiranës ka përfunduar edhe procedurën për marrje në pyetje të mjekëve të Spitalit të Traumës. Mjekët janë pyetur për gati 4 orë nga akuza. Në deklarimet e tyre 6 mjekët e turnit të natës kur ndërroi Lear Kurti kanë deklaruar që ai ka qenë pa shenja jete. Ketë fakt, ata e kanë shënuar edhe në kartelën mjekësore. Gjithashtu, mjekët janë shprehur se ata kanë bërë të pamundurën për ta rikthyer në jetë 32-vjeçarin, por pa ia arritur. Ndërkohë, këtë të hënë grupi hetimor po merret për zbardhjen e kësaj ngjarjeje po bën këqyrjen e kamerave te sigurisë së spitalit.
Kujtojmë se Lear Kurti ndërroi jetë mbrëmjen e 19 tetorit në zonën e “Don Boskos”. Ai nuk iu bind urdhrit të forcave të policisë për ndalim dhe më pas u shoqërua në komisariat me furgonin e një tjetër patrulle policie. Pak orë më vonë, ai ndërroi jetë. Më tej, u bë e ditur se në stomakun e të riut u gjet një qese e vogël me lëndë narkotike. Nga rezultatet paraprake të autopsisë rezultoi se substanca e gjetur në stomakun e të riut ishte lëndë narkotike e llojit kokainë. I riu kishte arritur pak para se të kapej nga efektivët, të gëlltiste dy qese të vogla me një sasi kokaine brenda saj.
Qeset janë të përmasave 5×5, të ngjashme me ato qeset që përdoren në farmaci për medikamentet. Sipas ekspertizës, shkak i vdekjes së Kurtit është arrest kardiak i shkaktuar nga mbidoza, por deri më sot nuk ka pasur një reagim zyrtar nga ana e tyre për të dëshmuar rezultatet konkrete në lidhje me shkaqet që i kanë marrë jetën. Po ashtu një nga mospërgjigjet e mëdha që nuk janë dhënë ende për ngjarjen që ndodhi në Komisariatin nr. 3 të Tiranës është fakti që Mjekësia Ligjore nuk ka bërë me dije orën e saktë se kur ka ndërruar jetë i riu, fakt ky që do të sqaronte së paku pingpongun mes policisë dhe spitalit të Traumës, që njëra palë thotë që e ka çuar të gjallë dhe pala tjetër ka dalë publikisht duke thënë se personi që kishte dërguar policia në spital nuk kishte shenja jeta. Po ashtu, Mjekësia Ligjore ende nuk ka bërë publike rezultatet e sasisë së lëndës që ka kaluar në stomak viktima, ndonëse prej të nesërmes së ngjarjes e deri më sot vijohet të thuhet se ai ka ndërruar jetë nga mbidoza, por pa e përcaktuar se sa ka qenë mbidoza që i mori jetën vetëm për pak minuta të riut.
Rrëfimi i motrës
Motra nga babai, Silvi ka folur për emisionin “Me zemër të hapur” në “News2 4”, ku ka deklaruar se e ka marrë vesh vdekjen e Learit nga shokët e tij. Ajo tha se Leari kishte ëndrra dhe ai për pak kohë do të vinte në Francë pasi kishte gjetur një punë.
“Në dijeninë time si motër unë them që kam folur shpesh në kamera me vëllain madje edhe nga tri orë dhe unë kurrë s’i kam parë Learit ndonjë problem droge apo ndonjë shqetësim tjetër. Por, Leari më fliste shpesh për mamin e tij pasi marrëdhënia e tij me mamin ishte shumë e fortë”, tha Silvi.
Si e mësove vdekjen e Learit?
E mësova në lajme. Më thanë “e ke parë vëllain”? Pastaj fola me shokët e Learit dhe më thanë ka vdekur. Fola më pas me Mirën (e ëma e Learit) dhe familjen.
Cili ka qenë komunikimi yt i fundit përpara 19 tetorit? Para një jave.
Çfarë keni diskutuar?
Kishim diskutuar për fëmijët, për punën. Bëmë një bisedë si çdo ditë. Folëm si po kalonim. Unë kam dy goca dhe ai është daja.
Si ka qenë marrëdhënia e tij me mbesat?
Shumë e mirë. Ne flisnim me kamera. Leari ishte shumë i dashur, ishte shumë i gëzuar për vajzat e mia. Fliste gjithmonë në kamera.
Si ka qenë fëmijëria juaj?
Ne kemi një histori shumë të veçantë dhe shumë të komplikuar. Kam folur me Learin kur doli “Facebook”-u dhe “Instagram”-i. Isha 14-15 vjeç dhe Leari kishte shumë qejf të kishte afër familjen e tij.
Ngaqë ishte i vetëm, kishte shumë dëshirë të fliste me mua. E mora vesh kur isha 14 vjeç. Më pas, ishte një kohë e gjatë që nuk flisnim, pasi isha në shkollë. Para disa muajsh, kemi folur shumë, ditë për ditë. Mund të flisnim 2-3 orë në ditë.
/e.d
