I ftuar në emisionin “Java në RTSH”, Vangjel Dule komentoi edhe aderimin në të njëjtin koalicion me PDIU-në e Shpëtim Idrizit.
Ai e cilësoi si zgjedhje nominale të Lulzim Bashës prezencën e PDIU-së në opozitën e bashkuar, teksa shtoi se distancohet nga këto zgjedhje të kreut të PD.
“Shpesh herë më kanë vënë pa dëshirën time në pozitat e një simboli të armikut. Individë të caktuar, shoqata apo parti duan që të vënë përballë njerëzve të tyre armiq. Jo se më shqetëson diçka e tillë, por për të qenë korrektë.
Ne jetojmë në një realitet në kontinent që bazohet në vendime të samiteve të forcave fituese të Luftës së Dytë Botërore. Kushdo që ndihet se i është bërë padrejtësi nga vendimet e forcave fituese ka aksesin në mekanizmat ligjore.
Dhe ka pasur komunitete në Europë që kanë gjetur padrejtësi nga këto vendime. Si rasti i Sudeteve” – tha Vangjel Dule.
Kreu i PBDNJ u shpreh se vendimet e asaj periudhe as nuk rishkruhen, as nuk parashkruhen.
Dule, duke iu referuar pretendimeve për çështjen çame, tha se nuk ka individë që iu është ndaluar hyrja në Greqi, përveç atyre me të dhëna inekzistente. Dule iu referua në këtë rast problematikave me toponimet.
“Megjithatë ky problem është tejkaluar dhe sot fryhen artificialisht” – shtoi kreu i PBDNJ në studion e emisionit “Java në RTSH”.
https://www.youtube.com/watch?v=4SC7vHsEQk4&t
