Suedia po përballet me një valë të shtuar të kriminalitetit dhe kjo ka sjellë mbipopullim të burgjeve dhe një zgjidhje të re për të burgosurit.
Qeveria suedeze mund të dërgojë të burgosurit për të kryer dënimet e tyre në burgje jashtë vendit, sipas një komisioni të caktuar.
Ministri i Drejtësisë, Gunnar Strommer, njoftoi se Suedia ka filluar bisedime me shtete të tjera për të marrë hapësira në burgjet e tyre, duke theksuar nevojën për zgjidhje të reja.
Krimi i bandave ka njohur një rritje të konsiderueshme gjatë dy dekadave të fundit, duke bërë që Suedia të renditet e para në Europë për dhunën me armë.
Burgjet dhe institucionet e paraburgimit janë të mbushura dhe Shërbimi i Burgjeve parashikon se do të ketë nevojë për rreth 27,000 shtretër deri në vitin 2033, krahasuar me 11,000 që ka aktualisht.
Mattias Wahlstedt, kreu i komisionit, tha se nuk ka pengesa ligjore për dërgimin e të burgosurve në burgje jashtë vendit, por një propozim i tillë do të duhet të miratohet më parë nga parlamenti. Po ashtu, autoritetet suedeze po përballen me një shpërthim të paprecedentë sulmesh me bomba, kryesisht në rajonin e kryeqytetit Stokholm, ku vetëm në janar janë regjistruar 30 shpërthime, shumica e të cilave akte shantazhi nga bandat kundër kompanive dhe qytetarëve.
