Urdhërdhënësi i katër vrasjeve kthehet tek vrasjet e 2 prillit

Lulzim Basha, i njohur si shefi de jure i pëdëistëve, këtë 2 prill, ishte në qytetin e Shkodrës. Për të përkujtuar një vrasje të katërfishtë, ndodhur 25 vite më parë, atëherë kur gjërat po ndodhnin me një rrokullisje të habitshme, por të pritur.

Nuk dua të futem në ngjarjet e 2 prillit të vitit 1991. Kjo është bërë nga të tjerët, është bërë edhe në disa shkrime të miat, vite më parë, por edhe vitet e fundit, e tani, rrëfimi në DITA, nga zëvendësshefi i policisë së kohës, po risjell edhe një herë ngjarjet e asaj dite.

Për mua, që në krye të herës , ka qenë e njohur dora që i qëlloi dhe, kur Emin Musliu, ish deputet i PD-së , në krye të Komisionit parlamentar kuvendor, cilësoi se vrasjet nuk ishi bërë nga policia, por me armë të tjera, kjo nuk ishte asgjë tjetër, veçse konfirmim i asaj që kisha ditur.

E dija se ku kishte qëndruar Azem Hajdari me 1 prill, në shtëpinë e cilit njeri, që e kisha mik edhe unë, si shokë gjimnazi; e dija edhe se çfarë kishte ngrënë, si kishte ikur pas mesnate i veshur me rroba grash në sediljen e pasme të një makine etj.

Nuk ka më kureshtje për ngjarjen, sepse ajo edhe nga vetë PD-ja e Berisha është qartësuar, duke e akuzuar Azem Hajdarin si njeriun që qëndronte pas vrasjeve.

E dija përse liderë e PD-së nuk i kishin dërguar fëmijët asaj dite në gjimnazin e tyre, përse ishin fshehur Arbnori, Spahia, kush priste në morg dhe nuk lejoi ekzaminimin e trupave të ndjerë,  e dija përse atë ditë të 2 prillit do të digjej ish Komiteti i Partisë, që veç të tjerave , kishte dosjet e stërmëdha të 45 viteve.

Dhe si unë, këtë e dinin shumë vetë.

I habitur jam me paturpësinë e një lideri – de jure gjithnjë – që, duke qëndruar vetë pas katër vrasjeve në një demonstratë shumë më paqësore dhe e qetë se ajo e 2 prillit, vjen tani e flet për demokraci, pikërisht në atë shesh, ku me porosi të shefave të tij, thjeshtë për të marrë pushtetin, vranë ato që u zuri dora, me përjashtim të Arben Brocit, që e kishte pritur këtë, dhe ishte si të thuash, dëshmi e një vrasje të paralajmëruar.

Thonë se vrasësi kthehet përsëri në vendin e krimit. Nuk e di në sa vende do të duhej të kthehej Berisha, e pas tij edhe Basha, pasi, gjëmat që kanë sjellur janë jo vetëm në Shkodër, por, për fat të keq, që nga Tropoja e deri në brigjet jugore që desh i falën, përsëri për pushtet.

Ndërsa shikoja përmes kanaleve TV pamjet e Bashës në Shkodër dhe dëgjoja fjalët e tij, e para gjë që më erdhi në mendje ishte, “si nuk ka turp”, por pastaj mendova se, kur je pjesë e krimit politik një herë dhe e pranon këtë, e ke lehtë të bësh edhe komedianin vrasës.

Kur dëgjon të flasë për lirinë, demokracinë, prosperitetin, ndershmërinë, një njeri, i cili , si pak kush, ka mbi vete gjithë të kundërtat e tyre, të vjen ndot.

Natyrisht opozita në çdo vend e kërkon pushtetin.

Kjo është e para, ndoshta e vetmja opozitë evropiane, e cila, që ditën kur u formua, e kërkoi dhe e kërkon pushtetin përmes vrasjeve, territ dhe poshtërimit.

Lereni të qetë Shkodrën.

Kurbanizimi i saj për hir të pushtetit, nga kushdo qoftë, vetëm hap plagë të reja, kur ende nuk ka mbyllur të vjetrat.

Mjaft, edhe kaq është tepër.

Bedri Islami / DITA