Në këtë fushatë elektorale, por edhe pas verdiktit qytetar është vënë re një kulturë e re politike, larg sulmeve personale mes kandidatëve. Këtë gjë e kanë treguar më së miri kandidati i ASHE-së dhe tashmë kryebashkiaku i ri i Tiranës Erion Veliaj, por edhe rivali i tij i djathtë Doktor Halim Kosova.
Madje ky i fundit, pasi uroi për fitoren Veliajn, i është bashkuar festës për fitore të të rinjve të Partisë Socialiste.
Ai është fotografuar me disa të rinj të FRESSH mes të cilëve ishte edhe Sekretari Organizativ Eljo Hyska, ku Doktor Halimi i është bashkuar darkës së fitores.
“Në darkën e fitores na u bashkua edhe një zotëri burrë” thuhet në postimin e të rinjve të FRESSH.
Ndërsa pak ditë më parë kryeministri Rama iu bashkua të rinjve të FRPD, duke u fotografuar e postuar në facebook nga Rama, sot Kosova dha një tjetër mesazh pozitiv.
Kosova ka thyer barrierat në këtë mënyrë duke treguar se nuk ka aspak komplekse, ndryshe nga të kaluarën në radhët e PD, që të urojë rivalin dhe madje edhe të festojë me të për fitoren, duke pranuar verdiktim qytetar.
Zgjedhjet vendore, jo vetëm që kaluan të qeta dhe të lira, por sollën në politikën shqiptare, një frymë të re, larg gjuhës së urrejtjes, e cila u reflektua edhe në mbarëvajtjen dhe përfundimin e procesit zgjedhor.
