Interesi për programet e Fakultetit të Shkencave të Natyrës vijon edhe gjatë këtij viti akademik. Regjistrimet shoqërohen me mundësi për formim praktik dhe përfshirje në kërkimin shkencor.
“Fakulteti i Shkencave të Natyrës mund ta quajmë bërthama e universitetit me shumë programe studimi duke filluar nga programet profesionale, programet bachelor dhe masterat shkencorë dhe profesional. Janë regjistruar mbi 250 studentë në degë të ndryshme ku numrin më të lartë e ka dega e infermierisë.
Fakulteti i Shkencave ka një staf akademik shumë të përgatitur me titull dhe grada shkencore, me laboratore shumë të mirë, njëkohësisht edhe ambientet janë shumë të përshtatshme për studentët”, u shpreh prof. as. dr. Rrok Smajlaj, Dekan i FNSH.
Pas diplomimit, studentët kanë mundësi për vijimin e studimeve dhe orientimin drejt tregut të punës.
“Fakulteti jonë për shembull ka tetë programe bachelor. Kemi infermieri e përgjithshme, një infermieri mami dhe fizioterapi që pa dyshim që ka një treg të jashtëzakonshëm pune jo vetëm në Shqipëri por janë duke ikur jashtë në vende të ndryshme të BE-së dhe në Amerikë dhe u njihet diploma. Dhe dy programe dyvjeçare të cilat kërkohen shumë: specialist i lartë elektrik dhe teknikë sistemesh dhe rrjetesh kompjuterike. Kush mbaron biologji kemi bachelor direct. Mund të hyjë një laborator ku bëhen për analiza biokimike por dhe laboratori privat në fushën e analizave ushqimore. Pra tregu i punës është shumë i gjerë”, deklaroi Smajlaj.
Fakulteti vijon të synojë një formim të kombinuar teorik dhe praktik, duke krijuar mundësi për zhvillimin akademik dhe profesional të studentëve.
