Kryetari i Komunës së Ulqinit, Nazif Cungu para Shtabit të Emergjencave paraqiti të dhënat nga mbledhja paraprake që kishte në Podgoricë në Ministrinë e Brendshme, respektivisht në takimin e Shtabit operativ ku është thënë se duke filluar nga sot deri ditën e hënë sipas meteorologëve, pritet përkeqësim i motit, me reshje të mëdha shiu, që mund të arrijnë 200-300 litra për metër katror.
Prandaj, tha ai para Shtabit, të gjithë duhet të jenë në gatishmëri të plotë që në varësi të situatës të marrim masat e duhura. Përkeqësim serioz i situatës parashikohet në zonat buzë lumit Buna, ku të gjithë qytetarët e zonave përkatëse janë ftuar të largojnë mjetet e lëvizshme dhe kafshët shtëpiake në lokalitete ku mund të shmangen dëmet materiale dhe jetësore.
Në rast të nevojës, Komuna e Ulqinit thekson se do të marrë edhe masat e nevojshme për evakuimin eventual të qytetarëve nga zonat e goditura, duke vënë në plan të parë gjithmonë, ruajtjen e jetës dhe shmangien e dëmeve materiale, përgatiti Koha. (b.an)
