Prokuroria e Tiranës ka verifikuar një skedë lëvizjesh dhe kontaktesh për Aleksandër Sadikajn, të riun që mbeti i vrarë në një atentat me eksploziv në 11 Qershor, ku provohen lidhjet e tij me njerëz të përfshirë në trafikun e drogës.
Krahas hetimit që po bëhet për zbulimin e momentit të vendosjes së lëndës plasëse në automjetin e Sadikajt, nëpërmjet këqyrjes së dhjetra kamerave të sigurisë pranë vendit të ngjarjes, grupi hetimor po heton edhe të shkuarën e tij, teksa problemet me trafikun e drogës mbeten ende një nga pistat hetimore.
Burime për mediat bëjnë me dije se për një periudhë 10-vjeçare, Sadikaj ka pasur udhëtime të shpeshta, kryesisht në rrugë tokësore drejt Greqisë.
Disa prej këtyre udhëtimeve tregojne lidhjen me një person nga Kuçova, i cili sipas të dhënave në sistemet e policisë është i përfshirë në vitin 2013 në aktivitetin e lëndëve narkotike të kokainës dhe heroinës nga Shqipëria në Greqi. Ky person rezulton në databazën e Policisë si anëtar i një organizate kriminale që merrej me trafik të heroines po ashtu nga Turqia në Greqi dhe tani ndodhet i arrestuar në shtetin grek bashkë me 8 persona të tjerë nga Kuçova dhe Tepelena.
/e.d
