Një biznesmen indian me banim në Kanada, Ripudaman Singh Malik, është qëlluar për vdekje brenda makinës së tij. Ai është shpallur i pafajshëm në vitin 2005, për bombardimin e avionit të “Air India” i cili shpërtheu në ajër në vitin 1985.
Ripudaman Singh Malik u qëllua për vdekje në makinën e tij në Surrey, British Columbia dhe policia gjeti një automjet të djegur aty pranë. Malik mohoi përfshirjen në sulmin terrorist që vrau 329 njerëz dhe u shpall i pafajshëm në vitin 2005, por policia u akuzua se kishte prishur hetimet.
Pas një gjyqi dy-vjeçar, Malik, një biznesmen sikh dhe i bashkë-akuzuari Ajaib Singh Bagri u liruan nga akuzat për vrasje masive dhe konspiracion në lidhje me dy shpërthimet. Bagri dhe Malik u akuzuan për vendosjen e bombave në bordin e avionit.
Fluturimi 182 i “Air India” nga Kanadaja në Indi shpërtheu në brigjet irlandeze, duke vrarë të gjithë 329 personat në bord – shumica prej tyre qytetarë kanadezë që vizitonin të afërmit në Indi – më 23 qershor 1985. Pothuajse në të njëjtën kohë, një bombë e dytë shpërtheu para kohe në Japoni, duke vrarë dy mbajtës të bagazheve.
Mediat ndërkombëtare shkruajnë se Policia kanadeze është duke zhvilluar hetime për vrasjen e biznesmenit dhe aktivistit Ripudaman Singh Malik, 37 vjet pas ngjarjes që tronditi Kanadanë. Nuk dihet nëse vrasja e tij ka lidhje me ngjarjen e vitit 1985./m.j
