Papa Leoni XIV ka shfuqizuar masat e kursimit të miratuara nga Papa Françesku në vitin 2021, në kulmin e pandemisë Covid-19, duke i rikthyer kardinalëve të Kurisë Romake 10% të pagës që u ishte shkurtuar.
Papa Leoni ka vendosur të shfuqizojë “masat e përmbajtjes së pagave” të miratuara nga Papa Françesku më 23 mars 2021, të cilat u ndërmorën për t’iu përgjigjur “sfidës së jashtëzakonshme të pandemisë”.
Sipas Papës Leonit, këto masa tani mund të hiqen, pasi institucionet e Selisë së Shenjtë dhe të Shtetit të Vatikanit do të vazhdojnë përpjekjet për të garantuar qëndrueshmërinë ekonomike përmes mjeteve të tjera.
Në praktikë, vendimi heq përfundimisht shkurtimin prej 10% të pagave të kardinalëve të Kurisë. Masa e vitit 2021 parashikonte shkurtime të ndryshme në varësi të kategorisë së punonjësve, si pjesë e përpjekjeve për të përballuar pasojat financiare të pandemisë.
Siç raportoi Vatican News, në atë kohë Papa Françesku uli me 10% pagat e kardinalëve të Kurisë, ndërsa pagat e drejtuesve dhe sekretarëve të Dikastereve, si dhe të punonjësve të tjerë të klasifikuar në nivelet C dhe C1, u ulën me 8%. Për punonjësit klerikë dhe fetarë u aplikua një ulje prej 3%.
Masat përfshinin gjithashtu ngrirjen e rritjeve dyvjeçare të pagave për vjetërsinë. Kjo masë preku të gjithë stafin aktual, ndërsa për punonjësit laikë u aplikua vetëm për ata nga niveli i katërt i pagave e lart, duke mos prekur kategoritë me pagat më të ulëta.
