Me qëllim të qetësimit të raporteve ndëretnike dhe të krijimit të kushteve plotësisht normale për qarkullim të automjeteve, banorët shqiptarë të Suhadollit, me kërkesë të kryetarit të Komunës, Agim Bahtiri, kanë marrë vendim për të larguar nga mesi i rrugës pengesën e vendosur në udhëkryqin në hyrje të Suhadollit, të cilin ata e quanin shesh dhe e kishin emërtuar “UÇK”.
Pengesa që ishte vendosur nga banorët e Suhadollit, pas bllokimit të urës kryesore mbi lumin Ibër, nga ana e serbëve, është larguar të shtunën në orën 14:00 nën mbikëqyrjen e kryetarit të Komunës Agim Bahtiri dhe anëtarëve të Këshillit të fshatit Suhadoll dhe në prani të përfaqësuesve të institucioneve ndërkombëtare.
Kryetari Bahtiri tha se duke falënderuar banorët e Suhadollit dhe kryetarin e fshatit, Gëzim Rama, është marrë vendimi për ta larguar këtë pengesë, me qëllim që të dërgohet mesazh te të gjithë njerëzit e vullnetit të mirë, se nuk na duhen pengesa dhe barrikada, por zhvillim ekonomik dhe mirëqenie për të gjithë qytetarët, pra si për shqiptarët, ashtu edhe për serbët dhe të tjerët që jetojnë në qytetin e Mitrovicës.
