“Arrest me burg” është masa e sigurisë e dhënë ditën e sotme nga Gjykata e Lezhës, për 29-vjeçarin Indrit Vejsiu i kapur me mina me telekomandë.
I riu, vëllai i prezantueses së njohur Alketa Vejsiu do të qëndrojë në qeli në vijim të hetimeve ndaj tij.
Indrit Vejsiu, 29 vjeç, nga Tirana, u vu në prangat e policisë mbrëmjen e kësaj të shtune pasi në aksin rrugor Milot-Lezhë, në kryqëzimin e Shënkollit, në mjetin e tij tip ‘Opel’ në një gomë rezervë në bagazh, u gjetën të fshehura katër mina me telekomandë.
Ato ishin të paketuara me nga dy cilindra materiali të ngurtë të mbështjellë me natriban, të dyshuara lëndë plasëse e llojit TNT.
Gjithashtu u gjetën edhe rreth 3 kilogramë lëndë e dyshuar narkotike kanabis sativa, e paketuar gati për shitje.
Arrestimi i Vejsiut u bë për veprat penale “Prodhim dhe shitje e lëndëve narkotike” dhe “Trafikim i lëndëve plasëse”.
